ការស្ទង់មតិថ្មីរបស់ Reuters/Ipsos ក៏បានបង្ហាញផងដែរថា ការគាំទ្រសាធារណៈ ចំពោះប្រធានាធិបតីសាធារណរដ្ឋ Donald Trump កើនឡើងបន្តិច បើទោះជាលទ្ធផលនោះ បានរកឃើញថា ប្រជាជនអាមេរិក បានស្តីបន្ទោសសមាជិកសភាគណបក្សសាធារណរដ្ឋ ច្រើនជាងសមាជិកសភាគណបក្សប្រជាធិបតេយ្យ ចំពោះការបិទរដ្ឋាភិបាលដោយផ្នែក។

ការស្ទង់មតិរយៈពេល ៦ថ្ងៃ ដែលបានបញ្ចប់នៅថ្ងៃចន្ទ (ទី២០ ខែតុលា) បានបង្ហាញការគាំទ្រ ចំពោះលោក Trump ៤២ភាគរយ ដោយកើនឡើង ២ភាគរយ ធៀបនឹងដើមខែមុននេះ ដោយមានចំណុចល្អៀងរង្វង់ ២ពិន្ទុ នៅក្នុងការស្ទង់មតិនេះ។ ប្រជាប្រិយភាពរបស់លោក Trump បានបន្តមានកម្រិត ចន្លោះពី ៤០ភាគរយ ទៅ ៤៤ភាគរយ គិតចាប់តាំងពីដើមខែមេសាមក។

ការស្ទង់មតិបានរកឃើញថា អ្នកឆ្លើយសំណួរ ៥០ភាគរយ មើលឃើញថា ថ្នាក់ដឹកនាំសភារបស់បក្សសាធារណៈរដ្ឋ សមនឹងទទួលបានការស្តីបន្ទោសបំផុត សម្រាប់ការបិទនេះ ខណៈដែល ៤៣ភាគរយ យល់ថាសមាជិកសភាជាន់ខ្ពស់នៃគណបក្សប្រជាធិបតេយ្យជាអ្នកបង្កបញ្ហាធំ។

ការបិទរដ្ឋាភិបាលរយៈពេលវែងបំផុតទី៣ ក្នុងប្រវត្តិសាស្ត្រអាមេរិក បានឈានចូលដល់ថ្ងៃទី២១ របស់ខ្លួនហើយ នៅថ្ងៃអង្គារ ទី២១ ខែតុលានេះ។ ការបិទបានចាប់ផ្តើមនៅថ្ងៃទី១ ខែតុលា ហើយបានធ្វើឲ្យបុគ្គលិកសហព័ន្ធរាប់សែននាក់ឈប់សម្រាកបណ្ដោះអាសន្នដោយមិនមានប្រាក់ខែ ដោយប៉ះពាល់ដល់ផ្នែកដ៏តូចនៃកម្លាំងពលកម្ម ជាអ្វីដែលអ្នកសេដ្ឋកិច្ចមើលឃើញថា ជាផលរំខានតិចតួចដល់កំណើនសេដ្ឋកិច្ច តែពលរដ្ឋអាមេរិកជាច្រើន កំពុងជួបការរំខាន តាមរយៈការពន្យារពេលចរាចរណ៍ផ្លូវអាកាសជាបន្តបន្ទាប់៕