កម្មវិធីស្បៀងអាហារពិភពលោក (WFP) របស់អង្គការសហប្រជាជាតិ (UN) នៅថ្ងៃអង្គារ (ទី២១ ខែតុលា) នេះ បានឲ្យដឹងថា ការផ្គត់ផ្គង់ទៅកាន់តំបន់ហ្កាហ្សា កំពុងកើនឡើង បន្ទាប់ពីមានបទឈប់បាញ់សម្របសម្រួលដោយសហរដ្ឋអាមេរិក ប៉ុន្តែនៅតែឆ្ងាយពីគោលដៅប្រចាំថ្ងៃរបស់ខ្លួន ដែលមានចំនួន ២.០០០តោន ដោយសារតែច្រកឆ្លងកាត់ ២ប៉ុណ្ណោះត្រូវបានបើក ហើយមិនមានចំណុចឆ្ពោះទៅតំបន់ភាគជើងនៃដែនដីនេះដែលជួបប្រទះនឹងទុរ្ភិក្សឡើយ។

បើយោងតាម WFP បានឲ្យដឹងថា ឥឡូវនេះ ស្បៀងអាហារប្រហែល ៧៥០តោន កំពុងចូលទៅក្នុងតំបន់ហ្កាហ្សាស្ទ្រីបជារៀងរាល់ថ្ងៃ ប៉ុន្តែកម្រិតនេះនៅតែទាបជាងតម្រូវការ បន្ទាប់ពីជម្លោះ ២ឆ្នាំ រវាងអ៊ីស្រាអែល និងក្រុមហាម៉ាស បានធ្វើឲ្យតំបន់ហ្កាហ្សាភាគច្រើនរងនូវការបំផ្លិចបំផ្លាញខ្ទេចខ្ទី។

អ្នកនាំពាក្យ WFP លោកស្រី Abeer Etefa បានប្រាប់សន្និសីទសារព័ត៌មាន នៅទីក្រុងហ្សឺណែវ ប្រទេសស្វីសថា «ដើម្បីអាចឈានដល់កម្រិតនេះ យើងត្រូវប្រើគ្រប់ចំណុចឆ្លងកាត់ព្រំដែនឥឡូវនេះ»។ 

លោកស្រីបានបញ្ជាក់ថា មានតែច្រកឆ្លងកាត់គ្រប់គ្រងដោយអ៊ីស្រាអែលចូលទៅកាន់តំបន់ហ្កាហ្សាចំនួន ២ប៉ុណ្ណោះដែលដំណើរការ គឺ Kerem Shalom នៅភាគខាងត្បូង និង Kissufim នៅភាគកណ្តាល។

គួរបញ្ជាក់ថា ផែនការបទឈប់បាញ់សម្របសម្រួលដោយប្រធានាធិបតីអាមេរិក លោក Donald Trump មានគោលបំណងឲ្យ «ជំនួយពេញលេញ» ត្រូវបានបញ្ជូនទៅតំបន់ហ្កាហ្សា។ មន្ត្រីសន្តិសុខអ៊ីស្រាអែលម្នាក់បាននិយាយថា ជំនួយមនុស្សធម៌ នៅតែបន្តចូលតាមច្រក Kerem Shalom និងច្រកឆ្លងកាត់ផ្សេង ស្របតាមផែនការ តែមិនបានបញ្ចេញឈ្មោះចក្រទាំងនោះឡើយ៕