ប្រភពអ្នកការទូតអឺរ៉ុប ៤នាក់ បាននិយាយថា បណ្តាប្រទេសអឺរ៉ុប កំពុងធ្វើការជាមួយអ៊ុយក្រែន លើសំណើថ្មីមួយសម្រាប់បទឈប់បាញ់នៅក្នុងសង្គ្រាមរបស់រុស្ស៊ី តាមបន្ទាត់សមរភូមិបច្ចុប្បន្ន ដោយដាក់បញ្ចូលជាចម្បងនូវគំនិតដែលកំពុងពិភាក្សារួចហើយ និងព្យាយាមរក្សាសហរដ្ឋអាមេរិក ឱ្យនៅក្នុងតួនាទីកណ្ដាលដ៏សំខាន់។

អ្នកការទូតជាន់ខ្ពស់អឺរ៉ុបមួយរូបបាននិយាយថា សំណើនេះរួមបញ្ចូលទាំងការបង្កើតក្រុមប្រឹក្សាសន្តិភាពមួយ ដែលនឹងដឹកនាំផ្ទាល់ដោយលោកប្រធានាធិបតីសហរដ្ឋអាមេរិក Donald Trump ហើយនឹងត្រួតពិនិត្យការអនុវត្តផែនការដែលបានស្នើឡើងនោះ។ អ្នកការទូតសង្កត់ធ្ងន់ថា "នេះជាកិច្ចប្រឹងប្រែងរបស់បណ្ដាទីប្រឹក្សាសន្តិសុខជាតិ ដើម្បីរក្សាវត្តមានអាមេរិក ឱ្យនៅក្នុងដំណើរមួយនេះ"។

ថ្នាក់ដឹកនាំអ៊ឺរ៉ុប កាលពីថ្ងៃអង្គារ (២១ តុលា) បានរួមគ្នាអំពាវនាវឱ្យទីក្រុងវ៉ាស៊ីនតោន ប្រកាន់ខ្ជាប់យ៉ាងម៉ឺងម៉ាត់ក្នុងការទាមទារឱ្យមានបទឈប់បាញ់ជាបន្ទាន់ក្នុងសមរភូមិបច្ចុប្បន្ននៅអ៊ុយក្រែន ដើម្បីបម្រើជាមូលដ្ឋានគ្រឹះសម្រាប់កិច្ចចរចាណាមួយនាពេលអនាគត។ រដ្ឋាភិបាលរុស្ស៊ី បានទាមទារជាយូរមកហើយឱ្យអ៊ុយក្រែន យល់ព្រមប្រគល់ទឹកដីបន្ថែមទៀតមុនពេលបទឈប់បាញ់ណាមួយអាចកើតមាន។

ប្រភពការទូតផ្សេងទៀតក៏បានបញ្ជាក់ពីដំណើរការរៀបចំកំពុងបន្តនៃផែនការនេះផងដែរ ដោយនិយាយថា គំនិតនៃក្រុមប្រឹក្សាសន្តិភាពនោះគឺយកគំរូតាមផែនការសន្តិភាព ២០ចំណុច របស់អាមេរិក នៅតំបន់ហ្កាហ្សា។ អ្នកការទូតជាន់ខ្ពស់បន្ថែមថា នៅពេលដែលភាគីជម្លោះទាំងពីរយល់ព្រមលើបទឈប់បាញ់មួយរួចហើយ នោះពួកគេនឹងចូលរួមក្នុងការចរចាលើទឹកដី ប៉ុន្តែនឹងមិនមានការទទួលស្គាល់ទឹកដីដែលកាន់កាប់ដោយរុស្ស៊ី ថាជារបស់រុស្ស៊ីនោះទេ៕