ប្រធានាធិបតីអ៊ុយក្រែន លោក Volodymyr Zelenskyy បាននិយាយកាលពីថ្ងៃអង្គារ (២១ តុលា) ថា រុស្ស៊ី "ស្ទើរតែមិនចាប់អារម្មណ៍នឹងការទូតដោយស្វ័យប្រវត្តិទៅហើយ" ដោយសារការពន្យារពេលសម្រេចចិត្តរបស់រដ្ឋបាលសហរដ្ឋអាមេរិក លើមីស៊ីលរយៈចម្ងាយឆ្ងាយ Tomahawk ឱ្យអ៊ុយក្រែន។

ក្នុងសុន្ទរកថាពេលយប់របស់ខ្លួន លោក Zelenskyy លើកឡើងថា រូបលោក និងលោកប្រធានាធិបតីអាមេរិក Donald Trump បានព្រមព្រៀងគ្នាថា ចំណុចចាប់ផ្តើមសម្រាប់កិច្ចពិភាក្សានឹងធ្វើឡើងជាមួយភាគីជម្លោះទាំងពីរ ឈប់នៅទីតាំងបច្ចុប្បន្នក្នុងសមរភូមិ ប៉ុន្តែជាថ្មីម្ដងទៀត "រុស្ស៊ីកំពុងធ្វើគ្រប់យ៉ាងដែលអាចធ្វើបាន ដើម្បីបោះបង់ចោលការទូត"។

លោកបន្តថា "ភ្លាមៗនៅពេលរឿងមីស៊ីលរយៈចម្ងាយឆ្ងាយនេះ កាន់តែស្រពេចស្រពិលសម្រាប់អ៊ុយក្រែន - រុស្ស៊ីស្ទើរតែមិនចាប់អារម្មណ៍នឹងការទូតទាល់តែសោះ"។ លោកសង្កត់ធ្ងន់ថា៖ "សមត្ថភាពរយៈចម្ងាយឆ្ងាយរបស់អ៊ុយក្រែនកាន់តែធំ ឆន្ទៈរបស់រុស្ស៊ីក៏កាន់តែធំដូចគ្នាក្នុងការបញ្ចប់សង្គ្រាម"។

ប្រធានាធិបតីអ៊ុយក្រែនរូបនេះនិយាយទៀតថា មីស៊ីល Tomahawk -- ដែលមានរយៈចម្ងាយ ២.៥០០គីឡូម៉ែត្រ ពោលគឺឆ្ងាយល្មមអាចបាញ់ចូលជ្រៅក្នុងទឹកដីរុស្ស៊ី រួមទាំងទីក្រុងមូស្គូផងដែរនេះ -- បានក្លាយជា "ការវិនិយោគដ៏រឹងមាំមួយក្នុងផ្នែកការទូត"។

ការលើកឡើងរបស់លោក Zelenskyy កើតឡើងស្របពេលកិច្ចប្រជុំកំពូលដែលបានគ្រោងទុករវាងលោក Trump និងប្រធានាធិបតីរុស្ស៊ី លោក Vladimir Putin ត្រូវបានផ្អាក កាលពីថ្ងៃអង្គារ ដោយសារទីក្រុងមូស្គូ បដិសេធចំពោះបទឈប់បាញ់ភ្លាមៗនៅអ៊ុយក្រែន ហើយបានបង្កភាពអាប់អួរលើការប៉ុនប៉ងចរចាសន្តិភាព៕