កម្មវិធីស្បៀងអាហារពិភពលោក WFP របស់អង្គការសហប្រជាជាតិបាននិយាយកាលពីថ្ងៃអង្គារថា ការផ្គត់ផ្គង់ទៅកាន់តំបន់ហ្កាហ្សាកំពុងកើនឡើង បន្ទាប់ពីបទឈប់បាញ់សម្របសម្រួលដោយសហរដ្ឋអាមេរិក ប៉ុន្តែនៅតែមានចំនួនតិចក្រោមគោលដៅប្រចាំថ្ងៃរបស់ខ្លួនដែលមានចំនួន២.០០០តោន ដោយសារមានតែច្រកឆ្លងកាត់ពីរប៉ុណ្ណោះត្រូវបានបើក ហើយមិនមានទៅដល់ទីតាំងដែលរងគ្រោះទុរ្ភិក្សធ្ងន់ធ្ងរ នៅភាគខាងជើងនៃតំបន់រងការឡោមព័ទ្ធនោះទេ។

យោងតាម WFP បានឱ្យដឹងថា អាហារប្រហែល ៧៥០ តោនឥឡូវនេះកំពុងចូលទៅក្នុងតំបន់ហ្កាហ្សាស្ទ្រីបជារៀងរាល់ថ្ងៃ ប៉ុន្តែនេះនៅតែទាបជាងទំហំនៃតម្រូវការ បន្ទាប់ពីជម្លោះពីរឆ្នាំរវាងអ៊ីស្រាអែល និងក្រុមហាម៉ាស ដែលបានកែប្រែដែនដីហ្កាហ្សាទៅជាគំនរកម្ទេចថ្ម។

អ្នកនាំពាក្យរបស់ WFP លោកស្រី Abeer Etefa បានប្រាប់សន្និសីទសារព័ត៌មាននៅទីក្រុងហ្សឺណែវថា ដើម្បីអាចឈានដល់ការបង្កើនទំហំនេះ ចាំបាច់ត្រូវប្រើគ្រប់ច្រកឆ្លងកាត់ព្រំដែនឥឡូវនេះ។

លោកស្រីបាននិយាយថា មានតែច្រកឆ្លងកាត់ដែលគ្រប់គ្រងដោយអ៊ីស្រាអែលចំនួនពីរចូលទៅក្នុងហ្កាហ្សា ប៉ុណ្ណោះគឺច្រក Kerem Shalom នៅភាគខាងត្បូង និង Kissufim នៅភាគកណ្តាល។

ចំណែកអ្នកនាំពាក្យទីភ្នាក់ងារកុមាររបស់អង្គការសហប្រជាជាតិ លោក Ricardo Pires បាននិយាយកាលពីថ្ងៃអង្គារថា ការឆ្លើយតបផ្នែកមនុស្សធម៌នៅតែទាបជាងទំហំដែលត្រូវការ ហើយបានអំពាវនាវឱ្យដំណើរការឡើងវិញគ្រប់ច្រកទាំងអស់។   

លោកស្រី Etefa បាននិយាយថា ការផ្គត់ផ្គង់អាហារូបត្ថម្ភមួយចំនួនសម្រាប់កុមារ និងស្ត្រីមានផ្ទៃពោះបានទៅដល់ភាគខាងជើង តាមរយៈភាគខាងត្បូង ប៉ុន្តែនៅខ្វះកម្រិតដែលត្រូវការ៕