ប្រធានាធិបតីអាមេរិក លោក Donald Trump បានលើកឡើងថា ប្រទេសមួយចំនួននៅមជ្ឈិមបូព៌ា បានស្នើបញ្ជូនកងកម្លាំងពួកគេទៅកាន់តំបន់ហ្កាហ្សា ដើម្បីប្រយុទ្ធប្រឆាំងនឹងក្រុមហាម៉ាស ដោយបញ្ជាក់ជាថ្មីនូវការគំរាមរបស់លោកលើក្រុមប៉ាឡេស្ទីនមួយនេះ ស្របពេលបទឈប់បាញ់ដ៏ផុយស្រួយ។

លោក Trump បានសរសេរបង្ហោះលើបណ្ដាញសង្គម Truth Social កាលពីថ្ងៃអង្គារ (២១ តុលា) ថា៖ សម្ព័ន្ធមិត្តដ៏អស្ចារ្យជាច្រើនរបស់អាមេរិកនៅមជ្ឈិមបូព៌ា និងតំបន់ជុំវិញមជ្ឈិមបូព៌ា បានបង្ហាញយ៉ាងច្បាស់ និងម៉ឺងម៉ាត់ថា ពួកគេនឹងស្វាគមន៍ឱកាសនេះ — តាមសំណើរបស់លោក — ដើម្បីចូលទៅហ្កាហ្សា ដោយប្រើកម្លាំងធុនធ្ងន់ និង "ប្រដៅក្រុមហាម៉ាស" ប្រសិនបើក្រុមសកម្មប្រយុទ្ធនេះនៅតែបន្តប្រព្រឹត្តអាក្រក់ ដោយរំលោភលើកិច្ចព្រមព្រៀងបទឈប់បាញ់។

លោក Trump មិនបានបញ្ជាក់ឡើយថាប្រទេសណាខ្លះដែលស្នើផ្តល់កម្លាំងចូលទៅហ្កាហ្សា ប៉ុន្តែលើកឡើងពី "ប្រទេសមជ្ឈិមបូព៌ា" ជាការឱ្យសញ្ញាថាមិនរួមបញ្ចូលឥណ្ឌូនេស៊ីឡើយ ដែលក៏បានស្នើផ្ដល់ជំនួយនៅក្នុងតំបន់។ លោក Trump បាន "ថ្លែងអំណរគុណដល់ឥណ្ឌូនេស៊ី និងថ្នាក់ដឹកនាំប្រទេសនេះ សម្រាប់ជំនួយទាំងអស់របស់ពួកគេដល់មជ្ឈិមបូព៌ា និងដល់សហរដ្ឋអាមេរិក"។

គួរឱ្យដឹងថា ទីក្រុងហ្សាកាតា និងរដ្ឋាភិបាលផ្សេងទៀត បានស្នើបញ្ជូនកងកម្លាំងរក្សាសន្តិភាពដើម្បីស្ដារសន្តិសុខ និងស្ថិរភាពនៅតំបន់ហ្កាហ្សា ប៉ុន្តែពុំមានប្រទេសណាមួយនិយាយច្បាស់ៗថា ខ្លួននឹងមានឆន្ទៈក្នុងការប៉ះទង្គិចដោយផ្ទាល់ជាមួយក្រុមហាម៉ាសឡើយ។ ជារឿយៗ លោក Trump ចេញការគំរាមកំហែងស្រដៀងគ្នានេះលើក្រុមហាម៉ាស ប៉ុន្តែគេមិនច្បាស់ទេថា តើអាមេរិក ឬកម្លាំងណាមួយ អាចផ្ដួលក្រុមប៉ាឡេស្ទីននេះបាន ខណៈអ៊ីស្រាអែល —ដែលបើកយុទ្ធនាការតាមកម្ចាត់ហាម៉ាសនៅហ្កាហ្សាអស់ពីរឆ្នាំមកហើយ — នៅមិនទាន់សម្រេចគោលដៅនេះបាននៅឡើយ៕