ប្រធានាធិបតីប៉េរូ លោក ហូហ៊្សេ ហឺរី (Jose Jeri) កាលពីថ្ងៃអង្គារ (២១ តុលា) បានប្រកាសស្ថានភាពអាសន្នរយៈពេល ៣០ថ្ងៃ នៅក្នុងរដ្ឋធានីលីម៉ា និងខេត្ត Callao ដែលនៅជិតនោះ ដោយនិយាយថា វិធានការនេះគឺដើម្បីប្រយុទ្ធប្រឆាំងនឹងឧក្រិដ្ឋកម្មដែលកំពុងកើនឡើង។ ការប្រកាសនេះធ្វើឡើងបន្ទាប់ពីការតវ៉ាយ៉ាងហិង្សាកាលពីសប្តាហ៍មុន ដែលសម្លាប់មនុស្សម្នាក់ និងជាង ១០០នាក់ របួស។

លោក Jeri បាននិយាយថា វិធានការនេះ -- ដែលចាប់ផ្តើមត្រឹមពាក់កណ្តាលអធ្រាត្រ ហើយត្រូវអនុម័តដោយទីស្តីការគណៈរដ្ឋមន្ត្រី -- បានអនុញ្ញាតឱ្យពង្រាយកងកម្លាំងប្រដាប់អាវុធ រួមគ្នានឹងនគរបាល ដើម្បីរក្សាសណ្តាប់ធ្នាប់សាធារណៈ។ លោកមិនផ្តល់សេចក្ដីលម្អិតបន្ថែមក្រៅពីនេះទេ។

ក្នុងសុន្ទរកថាតាមទូរទស្សន៍ លោកបាននិយាយថា "ប៉េរូកំពុងផ្លាស់ប្តូរពីជំហរការពារទៅជាការវាយបក ក្នុងការប្រយុទ្ធប្រឆាំងនឹងឧក្រិដ្ឋកម្ម ដែលនឹងអនុញ្ញាតឱ្យប៉េរូទទួលបានសន្តិភាព ភាពស្ងប់ស្ងាត់ និងជំនឿទុកចិត្តពីប្រជាជនប៉េរូរាប់លាននាក់"។

នេះមិនមែនជាលើកទីមួយទេ ដែលប៉េរូ បានប្រកាសគ្រាអាសន្នដើម្បីដោះស្រាយបញ្ហាសន្តិសុខ។ ទោះបីជាអតីតប្រធានាធិបតី លោកស្រី Dina Boluarte ធ្លាប់ដាក់វិធានការ ៣០ថ្ងៃដូចគ្នានេះកាលពីខែមីនាកន្លងទៅក៏ដោយ ក៏អ្នកវិភាគ និងអ្នកជំនាញផ្នែកសន្តិសុខបាននិយាយថា ការប្រកាសអាសន្នម្តងហើយម្តងទៀតបែបនេះជួយអ្វីមិនបានច្រើនទេ ក្នុងការកាត់បន្ថយឧក្រិដ្ឋកម្ម៕