អតីតនាយករដ្ឋមន្ត្រីថៃ និងជាមេដឹកនាំគណបក្សភឿថៃ (Pheu Thai) លោកស្រី Paetongtarn Shinawatra បានប្រកាសលាលែងពីតំណែងជាមេដឹកនាំគណបក្សភឿថៃ នៅទីស្នាក់ការកណ្តាលគណបក្សនៅព្រឹកថ្ងៃពុធនេះ។

មេដឹកនាំគណបក្សភឿថៃ លោកស្រី Paetongtarn Shinawatra បានចេញលិខិតសាធារណៈមួយ ជូនដំណឹងដល់សមាជិកបក្ស និងសាធារណជនថា លោកស្រីបានលាលែងពីតំណែងជាប្រធានគណបក្សហើយ។

ការលាលែងពីតំណែងនេះ កើតឡើងក្រោយតុលាការធម្មនុញ្ញថៃ បានរកឃើញកំហុសថាលោកស្រីបានបំពានក្រមសីលធម៌ធ្ងន់ធ្ងរកាលពីថ្ងៃទី២៩សីហាឆ្នាំនេះ ឈានដល់ការដកលោកស្រីពីតំណែង។ 

ក្នុងលិខិតនោះលោកស្រីនិយាយថា ថ្ងៃនេះ លោកស្រីបានសម្រេចចិត្តលាលែងពីតំណែងជាប្រធានគណបក្សភឿថៃ ដោយមានបំណងថា នេះជាការចាប់ផ្តើមនៃការផ្លាស់ប្តូរគណបក្សភឿថៃ ដូចដែលលោកស្រីបានប្រកាសកាលពីថ្ងៃទី ៧ ខែតុលា ឆ្នាំ ២០២៥ ។ នេះគឺជាមួយនឹងចក្ខុវិស័យថ្មី និងភាពក្លាហានក្នុងការផ្លាស់ប្តូរ ដើម្បីប្រជាជនក្នុងន័យពិតបំផុត។

បច្ចុប្បន្ននេះ ប្រទេសថៃស្ថិតក្នុងយុគសម័យដែលសង្គមពិភពលោកមានភាពផុយស្រួយ ស្មុគស្មាញ រសើប និងពិបាកទាយទុកជាមុន។ ប្រទេសថៃស្ថិតក្នុងដំណាក់កាលអន្តរកាលដ៏សំខាន់បំផុតជាមួយនឹងការបោះឆ្នោតនាពេលខាងមុខ។ ដូច្នេះហើយ គណបក្សភឿថៃ ដែលជាគណបក្សនយោបាយសំខាន់របស់ប្រទេស ចាំបាច់ត្រូវរុះរើ ផ្លាស់ប្តូររចនាសម្ព័ន្ធ ដំណើរការ និងរបៀបគិតគូរទាំងស្រុង ដើម្បីឲ្យគណបក្សនេះ អាចឈ្នះការបោះឆ្នោត រួចបន្តផ្លាស់ប្ដូរ និងស្តារប្រទេសថៃឡើងវិញ។

ទោះបីជាលោកស្រីលាលែងពីតំណែងថ្ងៃនេះក៏ដោយ ក៏លោកស្រីនៅតែជាសមាជិកនៃគណបក្សភឿថៃ ដែលជាប្រធាននៃគ្រួសារភឿថៃ ហើយនឹងចូលរួមជាមួយគ្នាក្នុងការបង្កើតគណបក្សភឿថៃសម័យថ្មី ដែលត្រៀមខ្លួនជាស្រេចដើម្បីឈរជាមួយប្រជាជន និងធ្វើការយ៉ាងរឹងមាំសម្រាប់ប្រទេសថៃ៕