ទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ សហភាព​សហព័ន្ធយុវជនកម្ពុជារាជធានីភ្នំពេញ និងដៃគូពាក់ព័ន្ធជាច្រើនផ្សេងទៀត សហការ​គ្នា​នឹង​រៀប​ចំ​កម្មវិធីពិព័រណ៍ការងារ និងផលិតភាពជាតិ រយៈពេល២ថ្ងៃ ចាប់ពីថ្ងៃទី១ និងទី២ ខែ​វិច្ឆិកា ឆ្នាំ២០២៥ខាងមុខ នៅអគារមជ្ឈមណ្ឌលពិព័រណ៍កោះពេជ្រ ក្រោមប្រធានបទ «វិថី​ឆ្ពោះ​ទៅ​​រកផលិតភាព៖ ផ្សារភ្ជាប់ជំនាញ បច្ចេកវិទ្យា និងឱកាសការងារ»។

លោក ស៊ុន មេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ នៅ​ក្នុង​សន្និសីទ​ពិព័រណ៍​ការងារ និងផលិតភាពជាតិ នាព្រឹកថ្ងៃទី២២ ខែតុលានេះ បានលើកឡើងឱ្យដឹងថា ពិព័រណ៍​នេះ រៀបចំឡើងក្នុងគោលបំណងបង្កើតជាវេទិកាជួបជុំដ៏ធំ រវាងអ្នកស្វែងរកការងារ និយោជក និងអ្នកផ្តល់ការអប់រំបណ្តុះបណ្តាល ដើម្បីដាក់ពាក្យស្វែងរកការងារ ជ្រើស​រើស​បុគ្គលិក ផ្សព្វផ្សាយព័ត៌មានឱកាសការងារ វគ្គអប់រំបណ្តុះបណ្តាល និងប្រឹក្សា​យោបល់​អាជីព​ការ​ងារ ​និងវិជ្ជាជីវៈ ព្រមទាំង បង្កើនការយល់ដឹង បណ្តុះផ្នត់គំនិត និងផ្សព្វផ្សាយ​ពី​ការ​បង្កើន​ផលិត​ភាព​ការងារ​។

លោកបានបញ្ជាក់បន្ថែមថា ព្រឹត្តិការណ៍នេះដែរ ក៏នឹងរួមបញ្ចូលនូវកិច្ចពិភាក្សា និង​ការ​ប្រកួត​ប្រជែង​និយាយ​ជាសាធារណៈ ដែលត្រូវបានរៀបចំឡើងយ៉ាងពិសេសក្រោមប្រធានបទ «វិថី​ឆ្ពោះ​ទៅ​រក​ផលិត​ភាព​៖ ផ្សារភ្ជាប់ជំនាញ បច្ចេកវិទ្យា និងឱកាសការងារ» ក្នុងគោលបំណង​បំផុស​គំនិត​ទាក់​ទង​នឹងផលិតភាពការងារ ដោយមានការចែករំលែកចំណេះដឹង បទពិសោធល្អៗ និង​គន្លឹះ​សំខាន់​ៗ ពីសំណាក់វាគ្មិនជំនាញៗដែលមានបទពិសោធយូរឆ្នាំនៅក្នុងវិស័យការងារ។

លោក សន ប៊ុនមាន ប្រធានលេខាធិការដ្ឋាន នៃសហភាពសហព័ន្ធយុវជនកម្ពុជា រាជធានីភ្នំពេញ បាន​អំពាវនាវសាធារណជនទូទៅ ជាពិសេសយុជន សិស្ស/និសិ្សត និងអ្នកស្វែងរកការរងារ ត្រៀម​ប្រវត្តិរូបសង្ខេប (CV) ឱ្យបានច្រើន ដើម្បីចូលរួមដាក់ពាក្យ និងសម្ភាសការងារភ្លាមៗ ដោយ​សារ​ព្រឹត្តិការណ៍នេះបាននាំឱកាសការងារជាង ៣ម៉ឺនកន្លែង ពីក្រុមហ៊ុន រោងចក្រ និង​សហគ្រាស​ធំៗចំនួន១៥០ ដើម្បីដាក់តាំងបង្ហាញ។ បន្ថែមពីនេះ អាចចូលរួម​ក្នុង​សិក្ខា​សាលា​អំពី​ការ​លើក​កម្ពស់ផលិតភាពដែលមានការចែករំលែកចំណេះដឹង និងបទពិសោធន៍​ល្អ​ៗ​ពី​សំណាក់​វា​គ្មិន​ជំនាញ​ជា​ច្រើនផងដែរ។

សូមបញ្ជាក់ជូនថា ពិព័រណ៍ការងារ និងផលិតភាពជាតិ ឆ្នាំ២០២៥ខាងមុខនេះ ក្រៅពី​ការ​រៀបចំ​ដោយ​ផ្ទាល់ ក៏នឹងមានរៀបចំតាមប្រព័ន្ធអនឡាញផងដែរ ដែលអ្នកស្វែងរ​ក​ការ​ងារ​ធ្វើនៅ​ទូទាំ​ង​ប្រទេស ​អាចដាក់ពាក្យស្វែងរកការងារធ្វើតាមប្រព័ន្ធអនឡាញបាន តាមរយៈគេហទំព័រ​របស់​ទីភ្នា​ក់​ងារ​ជាតិមុខរបរ និងការងារ ឬតាមរយៈលេខ Hotline របស់ក្រសួងការងារ ១២៩៧៕ អត្ថបទ៖ ឈិត បូរ៉ាវី