ឧត្តរមានជ័យ៖ ឯកឧត្តម ប៉ែន កុសល្យ គណៈអភិបាលខេត្តឧត្តរមានជ័យ បានលើកឡើងថា បច្ចុប្បន្ននេះ ស្រ្តីគឺជាឆ្អឹងខ្នង និងមានតួរនាទីដ៏សំខាន់ក្នុងការអភិវឌ្ឍ និងរួមចំណែកដ៏សំខាន់ ក្នុងការចុះពង្រឹងការផ្សព្វផ្សាយការងារនៅតាមមូលដ្ឋាន ដើម្បីពង្រឹងសមត្ថិភាពការងារផ្សេងៗ ជួយដល់សង្គមដូចបុរសៗផងដែរ។

មានប្រសាសន៍បែបនេះ ខណៈឯកឧត្តម ប៉ែន កុសល្យ អភិបាល​នៃ​គណៈអភិបាលខេត្ត​ឧត្តរមានជ័យ ​នឹងជាប្រធានគណៈកម្មាធិការគណបក្សខេត្តឧត្តរមានជ័យ អញ្ជើញ​ចូលរួម​បើកវគ្គបំប៉នពង្រឹងសមត្ថភាពដល់ស្រ្តី ដែលជាថ្នាក់ដឹកនាំមកពីបណ្តា ក្រុង ស្រុក ឃុំ សង្កាត់ នៃខេត្តឧត្តរមានជ័យ នាថ្ងៃទី៨កុម្ភៈនេះ។

ឯកឧត្តម ប៉ែន កុសល្យ បានបន្ថែមទៀតថា ស្ដ្រីបានដើរតួនាទីជួយ ផ្សព្វផ្សាយ​បញ្ជ្រាប​​នូវ​វិស័យ​យេនឌ័រ​ និង​ទប់ស្កាត់​នូវ​រាល់​អំពើ​ហិង្សា​ក្នុង​គ្រួសារ​នានា​ដែល​កើត​មានឡើង​នៅ​ក្នុង​សង្គម​បច្ចុប្បន្ន​ផងដែរ។

ជាមួយគ្នានោះដែរលោកជំទាវ មៀច សុធារី អគ្គលេខាធិការសមាគមនារីកម្ពុជា​ដើម្បី​សន្តិភាព​និងអភិវឌ្ឍន៍ បាន​កោតសសើរ​យ៉ាងខ្លាំង​ចំពោះបងប្អូនស្រ្តីយើងដែលកន្លងមក​ តែងតែ​ខិតខំ​បំពេញ​ភារកិច្ច​ការងារ​ដ៏​មមាញឹក​ទាំង​ការងារ​បក្ស ​និងការងារសង្គម​ក្នុង​ការ​ងារ​សម្របសម្រួល​ផ្សេងៗ នៅ​តាមមូលដ្ឋានជូនពលរដ្ឋតាមគោលដៅរបស់ខ្លួន ពិសេសនោះ ជួយ​ទប់ស្កាត់​នូវរាល់បញ្ហា​ប្រឈម​នានា​ពាក់ព័ន្ធ​និងអំពើហិង្សា​ចំពោះស្រ្តីនៅក្នុងគ្រួសារ​បាន​ល្អប្រសើរ នាពេលកន្លង​មក​​និង​ពេលបច្ចុប្បន្ន​នេះ។

លោកជំទាវ បានបន្តថា៖ ហើយអ្វីដែលសំខាន់នោះ ស្រ្តីយើងមានតួនាទីដ៏សំខាន់ក្នុងការជួយ​ការងារ​បោះឆ្នោតនៅពេលខាងមុខនេះ ដើម្បី​ជ្រើសរើស​សមាជិកជាថ្នាក់ដឹកនាំ​នៅ​តាម​បណ្តាក្រុងស្រុក ឃុំ សង្កាត់ ​របស់ខេត្តនៅថ្ងៃខាងមុខទាំងអស់នេះ ហើយ​គឺ​ជាអ្វីដែលស្រ្តី​អាច​ធ្វើបាន​និងជាកម្លាំង​ចលករដ៏​សំខាន់ក្នុង​ជួរ​បក្សផងដែរ។

លោកជំទាវ បានបញ្ជាក់ថា៖ ក្នុងឱកាសនាថ្ងៃបោះឆ្នោតខាងមុខនេះស្រ្តីគ្រប់រូប​គឺ​មាន​ភារកិច្ច​តួនាទី​សំខាន់​ណាស់​សំរាប់​បំពេញការងារសម្របសម្រួលក្នុងកិច្ចការ​ផ្សេងៗ​​សំរាប់សង្គមជាតិទាំង​មូល​ព្រោះ​សន្លឹកឆ្នោត១ សន្លឹកគឺមានតម្លៃណាស់​សំរាប់​ជោគ​វាសនា​របស់បងប្អូន​ក៏​ដូចជាប្រទេស​ជាតិ​ទាំងមូល៕អត្ថបទ៖ ឃិន សារិទ្ធ