ខ្យល់ក្ដៅ ដែលបោកបក់យ៉ាងខ្លាំងក្លាពាសពេញប្រទេសអូស្ត្រាលី និងនូវែលសេឡង់ នៅថ្ងៃពុធ (២២ តុលា) នេះ បានជំរុញកម្លាំងចំហេះព្រៃ និងបង្កើនសីតុណ្ហភាពនិទាឃរដូវឱ្យហក់ឡើងខុសធម្មតា ដោយបំបែកកំណត់ត្រាកម្ដៅនៅខែតុលា ក្នុងតំបន់មួយចំនួននៃទីក្រុងស៊ីដនី។

ការិយាល័យអាកាសធាតុអូស្ត្រាលី បាននិយាយថា ខ្យល់ក្តៅខ្លាំង ដែលបង្កើតខ្លួនពីលើតំបន់ដាច់ស្រយាលរបស់ប្រទេសកាលពីថ្ងៃអង្គារ ឥឡូវនេះកំពុងឆ្លងកាត់ភាគអាគ្នេយ៍ ហើយនាំមកនូវរលកកម្ដៅនិទាឃរដូវ។ ខ្យល់ខ្លាំងរហូតដល់ ១០០គីឡូម៉ែត្រក្នុងមួយម៉ោង បង្កើនគ្រោះថ្នាក់នៃចំហេះព្រៃ ហើយបង្ខំឱ្យអាជ្ញាធរចេញបម្រាមដុតភ្លើង ទូទាំងរដ្ឋ New South Wales ដែលមានប្រជាជនច្រើនជាងគេ។

អាជ្ញាធរនិយាយថា ចំហេះសរុប ៣៦កន្លែង បានឆាបឆេះ ដែលមាន ៩កន្លែង មិនទាន់ពន្លត់ទាំងស្រុង ហើយអ្នកស្រុកជិត ២ពាន់គ្រួសារ ពុំមានថាមពលអគ្គិសនីប្រើប្រាស់ទេ។ សីតុណ្ហភាពនៅតំបន់ពាណិជ្ជកម្មកណ្តាលរបស់ទីក្រុងស៊ីដនី បានកើនលើសពី ៣៧អង្សាសេ នៅពេលរសៀល ខណៈជាយក្រុងខាងលិច Penrith និង Bankstown ឡើងជិតដល់ ៤០អង្សាសេ ដែលបំបែកកំណត់ត្រាកម្ដៅខែតុលា។

នៅនូវែលសេឡង់វិញ ទូទាំងសមុទ្រ Tasman ក្នុងប្រទេសនេះ អាជ្ញាធរចេញការព្រមានពីខ្យល់ខ្លាំងកម្រិត "ពណ៌ក្រហម" ដ៏កម្រ - ដែលប្រើសម្រាប់តែព្រឹត្តិការណ៍អាកាសធាតុខ្លាំងបំផុតប៉ុណ្ណោះ - នៅផ្នែកកណ្តាល និងភាគខាងត្បូង។ ក្រុមពន្លត់អគ្គិភ័យ កំពុងទប់ទល់ចំហេះនៅជិតតំបន់ Kaikoura លើកោះភាគខាងត្បូង និងឈូងសមុទ្រ Hawke លើកោះភាគខាងជើង របស់នូវែលសេឡង់៕