ក្រុមមន្ត្រី និងអ្នកវិភាគបាននិយាយថា សេដ្ឋកិច្ចរបស់ប្រទេសអ៊ីរ៉ង់ កំពុងប្រឈមនឹងហានិភ័យនៃអតិផរណាខ្ពស់ក្នុងពេលដំណាលគ្នា និងការធ្លាក់ចុះសេដ្ឋកិច្ចយ៉ាងធ្ងន់ធ្ងរបំផុត ខណៈថ្នាក់ដឹកនាំអ៊ិស្លាមនិយម រិះរកមធ្យោបាយទប់ស្កាត់ភាពចលាចល បន្ទាប់ពីទណ្ឌកម្មរបស់អង្គការសហប្រជាជាតិ (UN) លើទីក្រុងតេអេរ៉ង់ បានត្រឡប់មកវិញ។

ទណ្ឌកម្មនេះបានកើតឡើងបន្ទាប់ពីកិច្ចចរចាដែលគ្មានលទ្ធផលជាមួយមហាអំណាចអឺរ៉ុប ក្នុងបំណងទប់ស្កាត់សកម្មភាពនុយក្លេអ៊ែរដែលមានជម្លោះរបស់អ៊ីរ៉ង់ និងកម្មវិធីមីស៊ីលបាលីស្ទិករបស់ខ្លួន។ ភាគីទាំងពីរបាននិយាយថា ផ្លូវការទូតដើម្បីដោះស្រាយភាពជាប់គាំងនៅតែអាចធ្វើទៅបាន ប៉ុន្តែមេដឹកនាំកំពូលអ៊ីរ៉ង់ លោក Ayatollah Ali Khamenei តែងបដិសេធសំណើរបស់លោកប្រធានាធិបតីអាមេរិក Donald Trump ក្នុងការបង្កើតកិច្ចព្រមព្រៀងថ្មីមួយ។

ប្រភពពីមន្ត្រីជាន់ខ្ពស់អ៊ីរ៉ង់ បាននិយាយថា ទីក្រុងតេអេរ៉ង់ ជឿជាក់ថា សហរដ្ឋអាមេរិក សម្ព័ន្ធមិត្តលោកខាងលិច និងអ៊ីស្រាអែល កំពុងបង្កើនការដាក់ទណ្ឌកម្ម ដើម្បីបញ្ឆេះភាពចលាចលក្នុងប្រទេសអ៊ីរ៉ង់ និងធ្វើឱ្យប៉ះពាល់ដល់អត្ថិភាពនៃសាធារណរដ្ឋអ៊ិស្លាម។

ក្រុមមន្ត្រីដដែលនេះបានប្រាប់សារព័ត៌មានរ៉យទ័រថា ចាប់តាំងពីការដាក់ទណ្ឌកម្មឡើងវិញរបស់ UN នៅថ្ងៃទី២៨ ខែកញ្ញា មក កិច្ចប្រជុំកម្រិតខ្ពស់ជាច្រើនត្រូវបានធ្វើឡើងនៅទីក្រុងតេអេរ៉ង់ ស្តីពីវិធីសាស្រ្តទប់ស្កាត់ការដួលរលំសេដ្ឋកិច្ច បញ្ចៀសទណ្ឌកម្ម និងគ្រប់គ្រងកំហឹងសាធារណៈ៕