អ្នកនាំពាក្យក្រសួងការពារជាតិរបស់ទីក្រុងប៉េកាំង នៅថ្ងៃពុធ (ទី២២ ខែតុលា) នេះ បានប្រាប់ឲ្យដឹងថា ចិនបានដាក់ចេញ «ការតវ៉ាយ៉ាងម៉ឺងម៉ាត់» ទៅកាន់អូស្ត្រាលី បន្ទាប់ពីមានឧប្បត្តិហេតុកណ្តាលអាកាសកាលពីចុងសប្តាហ៍កន្លងមក ដែលពាក់ព័ន្ធនឹងយន្តហោះយោធាមកពីប្រទេសទាំង២។

អូស្ត្រាលីបានឲ្យដឹងថា យន្តហោះស៊ើបការណ៍ Poseidon របស់ខ្លួន ត្រូវបានយន្តហោះចម្បាំងរបស់ចិនចូលទៅកៀក និងធ្វើនូវសកម្មភាពមិនសុវត្ថិភាព អំឡុងពេលល្បាតកាលពីថ្ងៃអាទិត្យ នៅសមុទ្រចិនខាងត្បូងដែលមានជម្លោះ។ ចំណែកយោធាចិន បានឲ្យដឹងកាលពីថ្ងៃចន្ទថា ខ្លួនបានចាត់វិធានការតបតប្រកបដោយប្រសិទ្ធភាព ដោយចោទយន្តហោះអូស្ត្រាលីថា បាន «រំលោភដោយខុសច្បាប់» ចូលទៅក្នុងដែនអាកាសរបស់ចិន នៅលើកោះ Xisha ដែលជាការប្រើឈ្មោះដោយទីក្រុងប៉េកាំង សម្រាប់ប្រជុំកោះ Paracel។

គួរបញ្ជាក់ថា នោះជាហេតុការណ៍ចុងក្រោយបង្អស់នៃការប៉ះទង្គិចជាបន្តបន្ទាប់ រវាងប្រទេសចិន និងអូស្ត្រាលី នៅក្នុងដែនអាកាស និងផ្លូវដឹកជញ្ជូននៃទ្វីបអាស៊ីដែលមានជម្លោះកាន់តែខ្លាំងឡើងៗ។

នៅថ្ងៃពុធនេះ ក្រសួងការពារជាតិរបស់ទីក្រុងប៉េកាំង បានប្រតិកម្មតបវិញ ដោយបានរិះគន់ធ្ងន់ៗ លើសេចក្តីថ្លែងការណ៍របស់អូស្ត្រាលី ដែលខ្លួនបាននិយាយថា៖ «បំភ្លៃការពិត ទម្លាក់កំហុសមកលើប្រទេសចិន ហើយប៉ុនប៉ងបិទបាំងការឈ្លានពានដ៏អាក្រក់ និងខុសច្បាប់»។

តាមរយៈសេចក្តីថ្លែងការណ៍ នៅលើប្រព័ន្ធអ៊ិនធឺណិត អ្នកនាំពាក្យក្រសួង លោក Jiang Bin បានបញ្ជាក់ថា៖ «យើងមានការមិនពេញចិត្តយ៉ាងខ្លាំង ចំពោះករណីនេះ ហើយបានលើកឡើងនូវការតវ៉ាយ៉ាងម៉ឺងម៉ាត់ជាមួយភាគីអូស្ត្រាលី»៕