អ្នកនយោបាយអភិរក្សនិយមដ៏រឹងត្អឹង គឺលោកស្រី Sanae Takaichi ដែលកោតសរសើរអតីតមេដឹកនាំអង់គ្លេស លោកស្រី Margaret Thatcher បានក្លាយជានាយករដ្ឋមន្ត្រីស្ត្រីដំបូងគេរបស់ប្រទេសជប៉ុន កាលពីថ្ងៃអង្គារ (ទី២១ ខែតុលា) ប៉ុន្តែក្រុមអ្នកវិភាគលើកឡើងថា ការរះឡើងរបស់លោកស្រី មិនមែនជាសញ្ញានៃជ័យជម្នះរបស់ស្ត្រីនិយមនោះទេ ខណៈបញ្ហាប្រឈមជាច្រើន កំពុងរង់ចាំឲ្យលោកស្រីដោះស្រាយ។

ស្ត្រីវ័យ ៦៤ឆ្នាំ ដែលទទួលបានតំណែងដឹកនាំគណបក្សប្រជាធិបតេយ្យសេរីនិយម (LDP) ដែលកំពុងកាន់អំណាច ក្នុងខែនេះ បានតាំងខ្លួនលោកស្រីថា ជាបុគ្គលដ៏ម៉ឺងម៉ាត់ដែលផ្តោតលើវិស័យការពារជាតិ និងសន្តិសុខសេដ្ឋកិច្ច។

បន្ទាប់ពីបានឈានដល់កិច្ចព្រមព្រៀងបង្កើតរដ្ឋាភិបាលចម្រុះ នៅនាទីចុងក្រោយ លោកស្រី Takaichi កាលពីថ្ងៃអង្គារ ត្រូវបានសភាតែងតាំងជាប្រមុខរដ្ឋាភិបាលស្ត្រីទី១ របស់ប្រទេស និងជាមេដឹកនាំទី៥ របស់ជប៉ុន ក្នុងរយៈពេល ៥ឆ្នាំ។

យ៉ាងណាក្ដី អ្នកបោះឆ្នោតភាគច្រើនបានឈប់គាំទ្រគណបក្ស LDP ដែលមានឥទ្ធិពលយូរមកហើយ ដោយសារអតិផរណា និងរឿងអាស្រូវមូលនិធិនាពេលថ្មីៗនេះ ហើយក្នុងពេលជាមួយគ្នា គណបក្សប្រឆាំងអន្តោប្រវេសន៍ គឺ Sanseito កំពុងទទួលបានប្រជាប្រិយភាពខ្លាំងឡើងៗ។ 

ជាកិច្ចប្រឹងប្រែង ដើម្បីដោះស្រាយបញ្ហាទាំងនោះ លោក Takaichi ដែលជាអតីតរដ្ឋមន្ត្រីសន្តិសុខសេដ្ឋកិច្ច បានប្រកាន់ជំហរតឹងរ៉ឹង ជុំវិញជនអន្តោប្រវេសន៍ និងភ្ញៀវទេសចរបរទេស ដែលបញ្ហាទាំង ២នេះ បានលេចឡើងជាបញ្ហាសំខាន់ អំឡុងដំណើរការប្រកួតប្រជែងដណ្ដើមតំណែងមេដឹកនាំបក្ស LDP៕