អ្នកនាំពាក្យរដ្ឋាភិបាលអ៊ីស្រាអែល ជំរុញឲ្យនាយករដ្ឋមន្ត្រីកាណាដា លោក Mark Carney លុបចោលសន្យារបស់លោក កុំគោរពតាមដីកាចាប់ខ្លួនរបស់តុលាការព្រហ្មទណ្ឌអន្តរជាតិ (ICC) សម្រាប់នាយករដ្ឋមន្ត្រី លោក Benjamin Netanyahu ប្រសិនបើលោកធ្វើដំណើរទៅកាន់ប្រទេសនេះ។

ស្ត្រីអ្នកនាំពាក្យ លោកស្រី Shosh Bedrosian បានប្រាប់អ្នកសារព័ត៌មានថា៖ «យើងជឿជាក់ថា លោកនាយករដ្ឋមន្ត្រី Carney គួរតែពិចារណាឡើងវិញ អំពីករណីនេះ ហើយស្វាគមន៍លោកនាយករដ្ឋមន្ត្រី Netanyahu ដែលជាមេដឹកនាំនៃរដ្ឋជ្វីហ្វ និងប្រទេសប្រជាធិបតេយ្យតែមួយគត់ នៅតំបន់មជ្ឈិមបូព៌ា ពេលលោកធ្វើដំណើរទៅប្រទេសកាណាដា»។

គួរបញ្ជាក់ថា នៅក្នុងបទសម្ភាសន៍ថ្មីៗនេះជាមួយប្រព័ន្ធផ្សព្វផ្សាយ Bloomberg លោក Carney ត្រូវបានសួរថា តើលោកនឹងបំពេញតាមការប្តេជ្ញាចិត្តរបស់អ្នកកាន់តំណែងមុន គឺលោក Justin Trudeau ក្នុងការឃុំខ្លួន Netanyahu ជុំវិញការចោទប្រកាន់ពីបទឧក្រិដ្ឋកម្មសង្រ្គាមដែរ ឬទេ ដោយចម្លើយរបស់លោក Carney គឺ «មែនហើយ»។

កាលពីសប្តាហ៍មុន ICC បានច្រានចោលការប៉ុនប៉ងរបស់អ៊ីស្រាអែល ក្នុងការប្តឹងឧទ្ធរណ៍ជំទាស់នឹងដីកាចាប់ខ្លួនដែលចេញដោយ ICC សម្រាប់លោក Netanyahu និងអតីតរដ្ឋមន្ត្រីការពារជាតិ លោក Yoav Gallant ពាក់ព័ន្ធនឹងសង្គ្រាមជាមួយក្រុមហាម៉ាស នៅតំបន់ហ្កាហ្សា។

នៅក្នុងសេចក្តីសម្រេចឆ្នាំមុន ICC បានរកឃើញ «មូលដ្ឋានហេតុផលសមហេតុផល» ក្នុងការជឿថា លោក Netanyahu និងលោក Gallant ត្រូវ «ទទួលខុសត្រូវព្រហ្មទណ្ឌ» ជុំវិញការចោទប្រកាន់ពីបទប្រព្រឹត្តឧក្រិដ្ឋកម្មសង្រ្គាម និងឧក្រិដ្ឋកម្មប្រឆាំងមនុស្សជាតិ នៅតំបន់ហ្កាហ្សា។ អ៊ីស្រាអែលបដិសេធការចោទប្រកាន់ទាំងអស់៕