ទីក្រុង Bogota កាលពីថ្ងៃអង្គារ (ទី២១ ខែតុលា) បានឲ្យដឹងថា ប្រធានាធិបតីកូឡុំប៊ី បានជួបជាមួយអ្នកការទូតជាន់ខ្ពស់របស់សហរដ្ឋអាមេរិក នៅក្នុងប្រទេស ហើយបានពិភាក្សា អំពីកិច្ចប្រឹងប្រែងប្រឆាំងគ្រឿងញៀន បន្ទាប់ពីជម្លោះជាសាធារណៈថ្មីជាមួយសមភាគី គឺលោក Donald Trump បានធ្វើឲ្យមានភាពអាប់អួ ក្នុងទំនាក់ទំនង រវាងដៃគូជាប្រវត្តិសាស្ត្រនេះ។

ក្រសួងការបរទេសកូឡុំប៊ី បានឲ្យដឹងនៅក្នុងសេចក្តីថ្លែងការណ៍មួយថា កាលពីថ្ងៃចន្ទ លោកប្រធានាធិបតី Gustavo Petro មាននូវកិច្ចប្រជុំដ៏យូរ ស្មោះត្រង់ និងប្រកបដោយការស្ថាបនា ជាមួយភារធារីសហរដ្ឋអាមេរិក លោក John McNamara បន្ទាប់ពីលោក Trump បានគំរាមលុបចោលជំនួយទាំងអស់ និងដំឡើងពន្ធទណ្ឌកម្មលើប្រទេសតំបន់អាមេរិកខាងត្បូងមួយនេះ។

សេចក្តីថ្លែងការណ៍បានបន្តថា៖ «តំណាងពីប្រទេសទាំង២ បានព្រមព្រៀងគ្នាថា នេះគឺជាជំហានដំបូងឆ្ពោះទៅរកការដោះស្រាយការប្រឈមមុខដាក់គ្នានាពេលបច្ចុប្បន្ន នៅក្នុងទំនាក់ទំនងទ្វេភាគី ហើយថា កិច្ចប្រជុំបន្ថែមទៀត នឹងត្រូវធ្វើឡើងក្នុងគោលបំណងឈានដល់ដំណោះស្រាយភ្លាមៗទាន់ពេលវេលា»។

គួរដឹងថា កាលពីថ្ងៃអាទិត្យចុងសប្ដាហ៍កន្លងទៅ លោក Trump ដែលបានបើកយុទ្ធនាការកងទ័ពជើងទឹកដ៍ខ្លាំងក្លាមួយ នៅតំបន់ការ៉ាអ៊ីព ប្រឆាំងនឹងក្រុមដែលសង្ស័យជួញដូរគ្រឿងញៀន បានរិះគន់លើលោក Petro ដែលជាអ្នកឆ្វេងនិយម ដោយហៅលោកថា ជា «ឈ្មួញគ្រឿងញៀនខុសច្បាប់»។ ហើយបន្ថែមពីលើការផ្អាកជំនួយ និងការដំឡើងពន្ធ លោក Trump បានគំរាមចាត់វិធានការដែលមិនបញ្ជាក់ឲ្យដឹង ដើម្បី «បញ្ឈប់» ការដាំដុះគ្រឿងញៀន នៅក្នុងប្រទេសនេះ ដែលជាប្រទេសផលិតសារធាតុកូកាអ៊ីនដ៏ធំបំផុតរបស់ពិភពលោក ប្រសិនបើលោក Petro មិនអាចធ្វើសកម្មភាពអ្វីទេនោះ។

រដ្ឋបាលរបស់លោក Petro ជំទាស់ថា ផ្ទុយពីការអះអាងរបស់លោក Trump ខ្លួនបានបន្តប្រយុទ្ធប្រឆាំងនឹងការផលិតគ្រឿងញៀន ដោយបង្ហាញពីការរឹបអូសបានក្នុងកម្រិតច្រើនបំផុត៕