​​អ៊ុយ​ក្រែ​ន​៖ សមយុទ្ធ​យុទ្ធសាស្ត្រ និង​ពិសេស​ចូលរួម​ដោយ​រថក្រោះ និង​កងកាំភ្លើងធំ​បាន​ធ្វើ​ឡើងនៅ​ទីក្រុង Kherson ភាគ​ខាងជើង​តំបន់​គ្រី​មៀ​។ ក្នុង​ពេល​មាន​ភាព​តានតឹង​ជាមួយ​ប្រទេស​រុស្ស៊ី យោធា​​អ៊ុយ​ក្រែ​នកំពុង​ប្រុងប្រយ័ត្ន​ចំពោះ​ការវាយប្រហារ​ដ៏​មាន​សក្ដានុពល។

​ជា​ផ្នែក​មួយ​នៃ​សម​យុទ្ធ អង្គភាព​ជាច្រើន​ត្រូវ​បាន​បណ្តុះ​បណ្តាល​ពិសេស ក្នុង​ការ​ចូល​ទៅដល់​តំបន់ដាច់ស្រយាល​។ លោក Sergei Nyev មេបញ្ជាការ​កងកម្លាំង​ចម្រុះ​អ៊ុយ​ក្រែ​ន​បាន​និយាយ​ថា គោល​បំណង​មួយ​គឺ​ចង់​ចូលទៅក្នុង​ទឹកដី​ដែល​ពិបាក​ទៅដល់ ដើម្បី​អាចធ្វើ​សកម្មភាព​ទាន់ពេល និងច្បាស់លាស់សម្រាប់​ការបង្ហាញ​ឧបករណ៍​នៅលើ​ទឹកដី​ទាំងនោះ​។ ​ការបង្កើន​ទាហាន​រុស្ស៊ី​ប្រមាណ​ ១០​ម៉ឺន​នាក់ នៅ​ជិត​ប្រទេស​អ៊ុយ​ក្រែ​ន បាន​ជំរុញ​ឲ្យ​មានការ​ព្រួយបារម្ភ​ពី​ប្រទេស​លោកខាងលិច ចំពោះ​ការវាយលុក​ដែល​អាច​កើតមាន​។ ​ក្នុង​កិច្ចខិតខំ​ប្រឹងប្រែង​ជា​អន្តរជាតិ ​ដើម្បី​ជៀសវាង​ការប្រឈមមុខ​ដាក់គ្នា​កាន់តែខ្លាំង កាលពី​ថ្ងៃ​ចន្ទប្រធានាធិបតី​បារាំង​លោក Emmanuel Macron បាន​ជួបពិភាក្សា​នៅ​ទីក្រុង​មូ​ស្គូ ជាមួយ​មេដឹកនាំប្រទេស​ពាក់ព័ន្ធ​ក្នុងការ​ព្រួយបារម្ភ ហើយ​អធិការបតី​អាល្លឺម៉ង់​លោក​ Olaf Scholz នៅក្នុង​ទីក្រុង​វ៉ាស៊ីនតោន​ជួប​ជាមួយលោក Joe Biden ដើម្បី​សម្របសម្រួល​គោលនយោបាយ ខណៈដែល​ការព្រួយបារម្ភ​នៃ​ការឈ្លានពាន​របស់​ប្រទេស​រុស្ស៊ី​កើនឡើង​។​ ​ទីប្រឹក្សា​សន្តិសុខ​ជាតិ​របស់​សេត​វិមាន​លោក Jake Sullivan បាន​ព្រមាន ថា ប្រទេស​រុស្ស៊ី​អាច ឈ្លានពាន​ប្រទេស​អ៊ុយ​ក្រែ​ននៅ​ថ្ងៃ​ណាមួយ ដែល​នឹង​បង្ក​ឱ្យ​ជម្លោះ​កើតមាន​កាន់តែ​ធំ​៕​

អត្ថបទ៖ ប៊ុនថន