កិច្ចព្រមព្រៀង ស្ដីពីឧក្រិដ្ឋកម្មតាមប្រព័ន្ធអ៊ីនធឺណិតរបស់អង្គការសហប្រជាជាតិ (UN) ដែលមានគោលបំណងទប់ស្កាត់បទល្មើសដែលធ្វើឲ្យសេដ្ឋកិច្ចពិភពលោកខាតបង់រាប់ពាន់លានដុល្លារជារៀងរាល់ឆ្នាំនោះ នឹងត្រូវចុះហត្ថលេខាដោយតំណាងមកពីរដ្ឋរាប់សិប ក្នុងទីក្រុងហាណូយ ប្រទេសវៀតណាម នាចុងសប្តាហ៍នេះ បើទោះបីជាមានការរិះគន់ ជុំវិញហានិភ័យសិទ្ធិមនុស្សក៏ដោយ។

អនុសញ្ញាដែលនឹងចូលជាធរមានបន្ទាប់ពីវាត្រូវបានផ្តល់សច្ចាប័នដោយរដ្ឋចំនួន ៤០ គឺជាចំណាត់ការមិនធ្លាប់មាន ដែល UN រំពឹងថា នឹងឆ្លើយតប ចំពោះឧក្រិដ្ឋកម្មតាមប្រព័ន្ធអ៊ីនធឺណិតកាន់តែលឿន និងមានប្រសិទ្ធភាពជាងមុន។

សកម្មជន ក្រុមហ៊ុនបច្ចេកវិទ្យាធំៗ និងឧត្តមស្នងការ UN ទទួលបន្ទុកសិទ្ធិមនុស្ស បានព្រមានអំពីការរំលោភបំពានដែលអាចកើតមាន ជុំវិញភាសាមិនច្បាស់លាស់របស់កតិកាសញ្ញានេះ ពាក់ព័ន្ធនឹងឧក្រិដ្ឋកម្ម ដោយអ្នកខ្លះលើកឡើងថា វានឹងជួយសម្រួល ជាជាងប្រយុទ្ធប្រឆាំងនឹងសកម្មភាពខុសច្បាប់។

បញ្ជីឈ្មោះប្រទេសហត្ថលេខីមិនត្រូវបានបញ្ចេញឲ្យដឹងនោះទេ ទោះបីជាសហភាពអឺរ៉ុប (EU) និងកាណាដា គ្រោងនឹងចុះហត្ថលេខាលើកតិកាសញ្ញានេះដែលប្រទេសទាំងនោះ បានបញ្ជាក់ថា រួមបញ្ចូលនីតិវិធី ដើម្បីការពារសិទ្ធិមនុស្ស។ ចំណែកក្រសួងការបរទេសអាមេរិក បានបដិសេធមិននិយាយថា តើតំណាងសហរដ្ឋអាមេរិក នឹងចូលរួមក្នុងពិធីចុះហត្ថលេខានេះដែរ ឬអត់។

ការជ្រើសរើសវៀតណាមធ្វើជាម្ចាស់ផ្ទះ បាននាំឲ្យមានការរិះគន់ដោយសារតែកំណត់ត្រាសិទ្ធិមនុស្សរបស់ប្រទេសនេះ។ នៅក្នុងរបាយការណ៍មួយ កាលពីខែសីហា ក្រសួងការបរទេសអាមេរិកបានលើកឡើងពី «បញ្ហាសិទ្ធិមនុស្សសំខាន់ៗ» នៅវៀតណាម ក្នុងនោះរួមទាំងការរឹតបន្តឹងលើសេរីភាពបញ្ចេញមតិតាមប្រព័ន្ធអ៊ីនធឺណិតផងដែរ។

បើយោងតាមអង្គការឃ្លាំមើលសិទ្ធិមនុស្ស បានឲ្យដឹងថា យ៉ាងហោចណាស់មនុស្ស ៤០នាក់ ត្រូវបានចាប់ខ្លួនក្នុងឆ្នាំនេះ នៅវៀតណាម ជុំវិញបទឧក្រិដ្ឋកម្ម ក្នុងនោះរួមទាំងការបង្ហោះតាមប្រព័ន្ធអ៊ីនធឺណិតប្រឆាំងនឹងរដ្ឋ៕