ប្រភពយោធាស៊ូដង់ បានប្រាប់បណ្ដាញសារព័ត៌មានថា នៅថ្ងៃពុធ (ទី២២ ខែតុលា) នេះ យានដ្រូនរបស់យោធាប៉ារ៉ា បានដាក់គោលដៅលើអាកាសយានដ្ឋានអន្តរជាតិ ក្នុងទីក្រុង Khartoum ដែលជាថ្ងៃទី២ បន្តបន្ទាប់គ្នា។

ដោយនិយាយក្នុងលក្ខខណ្ឌមិនបញ្ចេញឈ្មោះ ដោយសាររូបលោកមិនត្រូវបានអនុញ្ញាតឲ្យផ្ដល់ព័ត៌មានទៅប្រព័ន្ធផ្សព្វផ្សាយនោះ ប្រភពបានបញ្ជាក់ថា៖ «យានដ្រូនបានកំណត់គោលដៅលើអាកាសយានដ្ឋាន ក្នុងទីក្រុង Khartoum ម្ដងទៀត នាព្រឹកព្រលឹមថ្ងៃពុធនេះ»។

លោកបានបន្ថែមថា ប្រព័ន្ធការពារដែនអាកាសរបស់កងទ័ព បានស្ទាក់ចាប់យានដ្រូនទាំងនោះដែលលោកបាននិយាយថា ត្រូវបានបាញ់បង្ហោះ ដោយ «កងជីវពលភេរវករ» ដែលជាការនិយាយសំដៅទៅកងកម្លាំងគាំទ្ររហ័ស (RSF) ជាក្រុមដែលបានប្រយុទ្ធជាមួយកងទ័ពរបស់ប្រទេសស៊ូដង់ ចាប់តាំងពីខែមេសា ឆ្នាំ២០២៣ មក។

អាកាសយានដ្ឋាននេះ ត្រូវបានគ្រោងនឹងបើកឡើងវិញ នៅថ្ងៃពុធនេះ សម្រាប់ជើងហោះហើរក្នុងស្រុក ដែលជាលើកដំបូងក្នុងអំឡុងពេលមានសង្គ្រាមជាង ២ឆ្នាំនេះ។ តែយ៉ាងណាក្ដី វានៅតែមិនទាន់ច្បាស់នោះទេថា តើប្រតិបត្តិការនឹងដំណើរការដូចការគ្រោងទុកដែរ ឬទេ បន្ទាប់ពីមានការវាយប្រហារចុងក្រោយនេះ។

RSF មិនបានអះអាងទទួលខុសត្រូវ ចំពោះការវាយប្រហារនេះទេ ប៉ុន្តែត្រូវបានចោទប្រកាន់ម្តងហើយម្តងទៀតថា បានប្រើយានដ្រូន ដើម្បីកំណត់គោលដៅលើហេដ្ឋារចនាសម្ព័ន្ធយោធា និងស៊ីវិល ក្នុងរយៈពេលប៉ុន្មានខែថ្មីៗនេះ។

គួរបញ្ជាក់ថា ជម្លោះកាន់តែធំឡើងៗនេះ បានឆក់យកជីវិតមនុស្សរាប់ម៉ឺននាក់ បណ្ដាលឲ្យប្រជាជនជិត ១២លាននាក់ចាកចេញពីផ្ទះសម្បែង ហើយបង្កើតបានជាការបម្លាស់ទីលំនៅ និងវិបត្តិអត់ឃ្លានដ៏ធំបំផុតរបស់ពិភពលោក៕