អ្នកឆ្លើយឆ្លងព័ត៌មានរបស់ប្រព័ន្ធផ្សព្វផ្សាយ Al Arabiya បានរាយការណ៍នៅថ្ងៃពុធ (ទី២២ ខែតុលា) នេះថា ការប្រយុទ្ធគ្នា រវាងកងកម្លាំងសន្តិសុខស៊ីរី និងក្រុមសកម្មប្រយុទ្ធបារាំង បានផ្ទុះឡើងពេញមួយយប់ក្នុងតំបន់ Harem របស់ទីក្រុង Idlib នៅភាគពាយព្យនៃប្រទេសស៊ីរី។

អ្នកឆ្លើយឆ្លងព័ត៌មានបានបន្ថែមថា កងកម្លាំងសន្តិសុខស៊ីរី កំពុងឡោមព័ទ្ធជំរំមួយ ដែលក្រុមសកម្មប្រយុទ្ធបារាំង បាននិងកំពុងលាក់ខ្លួន។ យោងតាមប្រភពព័ត៌មាននានា បានឲ្យដឹងថា ប្រតិបត្តិការដែលផ្តោតលើជំរុំនៅតំបន់ Harem នេះ គឺទាក់ទងនឹងកិច្ចប្រឹងប្រែងរបស់ស៊ីរី ក្នុងការប្រគល់ខ្លួនក្រុមឧទ្ទាមបារាំងដែលរដ្ឋាភិបាលរបស់ពួកគេចង់បានខ្លួន។

កូនប្រុសរបស់ក្រុមជ្រុលនិយមបារាំងដ៏លេចធ្លោម្នាក់នៅក្នុងជំរំនេះ ដែលប្រាប់ឈ្មោះហៅក្រៅ Jibril al-Mouhajir បាននិយាយទៅកាន់បណ្ដាញសារព័ត៌មានថា៖ «ការប្រយុទ្ធគ្នាបានផ្ទុះឡើងក្រោយពាក់កណ្តាលអធ្រាត្រ និងកំពុងបន្ត»។ លោក Al-Mouhajir បាននិយាយថា រដ្ឋាភិបាលបារាំងបានទាមទារឲ្យ «ប្រគល់ជនជាតិបារាំង ២នាក់ ក្នុងក្រុមនេះ» ទៅឲ្យអាជ្ញាធរស៊ីរី។

អ្នកស្រុកម្នាក់នៃតំបន់ Harem ជាកន្លែងដែលជំរុំមានទីតាំងនៅជិតព្រំដែនប្រទេសទួរគី បានឲ្យដឹងថា លោកបានឃើញកងកម្លាំងរដ្ឋាភិបាលនាំយកកម្លាំងជំនួយទៅដល់តំបន់នេះ តាំងពីថ្ងៃអង្គារ ហើយសំឡេងផ្ទុះបានលាន់ឡើង។

ក្រុមជ្រុលនិយមបរទេស គឺ Firqatul Ghuraba ត្រូវបានដឹកនាំដោយលោក Omar Omsen ដែលត្រូវបានគេស្គាល់ផងដែរឈ្មោះ Omar Diaby ជាអតីតឧក្រិដ្ឋជនសញ្ជាតិ ២ បារាំង-សេណេហ្គាល់ ដែលបានក្លាយទៅជាអ្នកផ្ដល់ឱវាទខាងសាសនា៕