ម៉ាដាហ្គាស្កា៖ ក្រុមមន្ត្រីបាននិយាយថា ព្យុះស៊ីក្លូន Batsirai បោកបក់ខ្លាំងបណ្តាលឲ្យមនុស្ស ២០នាក់ស្លាប់ក្នុងប្រទេសម៉ាដាហ្គាស្កា និងបណ្ដាលឱ្យប្រជាជនជាង ៥៥,០០០នាក់ក្លាយជាជនរងគ្រោះគ្មានផ្ទះសម្បែង បន្ទាប់ពីបានបោកបក់ខ្លាំងមកលើឆ្នេរសមុទ្រភាគខាងកើត របស់ប្រទេសកោះមួយនេះ។
ក្រសួងឧតុនិយមជាតិបាននិយាយថា ព្យុះស៊ីក្លូនបានចុះខ្សោយឆាប់រហ័ស នៅពេលដែលវាបានផ្លាស់ទីទៅភាគនិរតីឆ្លងកាត់កោះនេះ ដែលបង្កហានិភ័យតិចដល់តំបន់ផ្សេងទៀតលើកលែងតែមានភ្លៀងធ្លាក់ខ្លាំង។ នាយកដ្ឋានអាកាសធាតុបាននិយាយថា ព្យុះស៊ីក្លូន Batsirai ជាព្យុះស៊ីក្លូនធំទីពីរនៅអាហ្វ្រិកខាងត្បូងក្នុងឆ្នាំនេះ ត្រូវបានគេព្យាករណ៍ថានឹងរសាយបាត់នៅពេលដែលវាចេញពីប្រទេសម៉ាដាហ្គាស្កា ហើយនឹងមិនបង្កហានិភ័យធ្ងន់ធ្ងរដល់ប្រទេសម៉ូហ្សំប៊ិកនោះទេ។ ប្រធានាធិបតីលោក Andry Rajoelina បានទៅទីក្រុង Mananjary ដើម្បីពិនិត្យមើលការបំផ្លាញដោយសារព្យុះ និងពិនិត្យក្នុងកិច្ចខិតខំប្រឹងប្រែងសង្គ្រោះ។
ក្រុមមន្ត្រីបាននិយាយថា ព្យុះស៊ីក្លូន Batsirai បានបំផ្លាញលំនៅដ្ឋាន និងអគាររដ្ឋាភិបាលប្រមាណ ៣ពាន់ខ្នង ហើយបានជន់លិចលំនៅដ្ឋាន ៥,៧០០កន្លែងផ្សេងទៀតនៅក្នុងទីក្រុង Mananjary និងទីក្រុងក្បែរនោះ។ នាយកកម្មវិធីស្បៀងអាហារពិភពលោកនៅប្រទេសម៉ាដាហ្គាស្កា លោកស្រី Pasqualina DiSirio បានព្រមានថា ដំណាំបានរងការខូចខាតដោយសារព្យុះស៊ីក្លូន ដែលនឹងគំរាមកំហែងដល់ការផ្គត់ផ្គង់ស្បៀងរបស់ប្រទេសក្នុងរយៈពេលច្រើនខែខាងមុខ។ លោកស្រីនិយាយថា ស្រូវគឺជាដំណាំសំខាន់សម្រាប់ប្រជាជន ហើយពួកគេនឹងរងផលប៉ះពាល់ធ្ងន់ធ្ងរលើបញ្ហាសន្តិសុខស្បៀងក្នុងរយៈពេល ៣ ទៅ ៦ខែខាងមុខ ប្រសិនបើយើងគ្មានសកម្មភាពសង្គ្រោះភ្លាមៗ៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
