ប្រធានាធិបតីអាមេរិក លោក Donald Trump បាននិយាយកាលពីថ្ងៃពុធ (២២ តុលា) ថា លោករំពឹងថានឹងអាចឈានដល់កិច្ចព្រមព្រៀងជាច្រើនជាមួយលោកប្រធានាធិបតីចិន Xi Jinping នៅពេលមេដឹកនាំទាំងពីរជួបគ្នានៅកូរ៉េខាងត្បូង សប្តាហ៍ក្រោយនេះ ដែលអាចមានដូចជា ការទិញសណ្តែកសៀងអាមេរិកឡើងវិញដោយទីក្រុងប៉េកាំង ពាណិជ្ជកម្ម និងដែនកំណត់អាវុធនុយក្លេអ៊ែរជាដើម។

ថ្លែងប្រាប់អ្នកយកព័ត៌មានក្នុងការិយាល័យប្រធានាធិបតី Oval Office លោក Trump បានលើកឡើងថា លោកក៏គ្រោងពិភាក្សាជាមួយចិន អំពីការទិញប្រេងរុស្ស៊ី និងវិធីសាស្រ្តបញ្ឈប់សង្គ្រាមរបស់រុស្ស៊ីនៅអ៊ុយក្រែន ដែលឥឡូវនេះមានអាយុកាលច្រើនឆ្នាំមកហើយ។

ក្នុងអំឡុងពេលកិច្ចប្រជុំជាមួយប្រធានអង្គការណាតូ លោក Mark Rutte — លោក Trump បានប្រាប់អ្នកយកព័ត៌មានថា "លោកគិតថាភាគីទាំងពីរនឹងធ្វើកិច្ចព្រមព្រៀងមួយបាន" ដោយបន្ថែមថា លោកជឿជាក់ថា លោក Xi បានផ្លាស់ប្តូរការគិតរួចទៅហើយលើសង្រ្គាមនៅអ៊ុយក្រែន ហើយនឹងទទួលយកការពិភាក្សាពីការបញ្ចប់សង្រ្គាមនេះ រួមទាំងរឿងពាណិជ្ជកម្មផងដែរ។

ប្រធានាធីបតីអាមេរិករូបនេះសង្កត់ធ្ងន់ថា កិច្ចព្រមព្រៀងមួយក៏អាចធ្វើទៅបានដែរ ស្តីពីអាវុធនុយក្លេអ៊ែរ ដោយសារភាគីរុស្ស៊ី បានលើកពីលទ្ធភាពនៃការបន្ធូរបន្ថយភាពតានតឹងអាវុធនុយក្លេអ៊ែរទ្វេភាគី ហើយចិន អាចត្រូវដាក់បញ្ចូលទៅក្នុងកិច្ចប្រឹងប្រែងនោះ។ គួរបញ្ជាក់ផងដែរថា កិច្ចប្រជុំដែលបានគ្រោងទុករបស់លោក Trump-Xi នៅកូរ៉េខាងត្បូង នាសប្ដាហ៍ក្រោយនេះ នឹងក្លាយជាការជួបដោយផ្ទាល់លើកដំបូងជាមួយមេដឹកនាំចិន ក្នុងអំឡុងរដ្ឋបាលលើកទីពីររបស់លោក Trump៕