សេវាសន្តិសុខរដ្ឋរបស់អ៊ុយក្រែន បានបើកបង្ហាញយានដ្រូនបើកនៅសមុទ្រថ្មីរបស់ខ្លួន ដែលបានធ្វើឱ្យប្រសើរឡើងជាងមុន ក្នុងអ្វីដែលទីក្រុងគីវអះអាងថា ឥឡូវនេះអាចប្រតិបត្តិការគ្រប់ទីកន្លែងក្នុងសមុទ្រខ្មៅ បំពាក់អាវុធធុនធ្ងន់ជាងមុន និងប្រើបញ្ញាសិប្បនិម្មិត AI សម្រាប់កំណត់គោលដៅទៀតផង។

អ៊ុយក្រែន តែងប្រើយានដ្រូនរបស់កងទ័ពជើងទឹក ដើម្បីកំណត់គោលដៅលើការដឹកជញ្ជូន និងហេដ្ឋារចនាសម្ព័ន្ធរបស់រុស្ស៊ី ក្នុងសមុទ្រខ្មៅ។ សេវាសន្តិសុខអ៊ុយក្រែន ដែលត្រូវស្គាល់ដោយអក្សរកាត់ជាភាសាអ៊ុយក្រែនថា SBU បានលើកសរសើរសមត្ថភាពនៃការវាយប្រហារដោយទូកដ្រូនទាំងនោះហៅថា "Sea Baby" ដែលបានបង្ខំឱ្យមានការផ្លាស់ប្តូរជាយុទ្ធសាស្រ្តក្នុងប្រតិបត្តិការកងទ័ពជើងទឹករុស្ស៊ី។

ក្រុមមន្រ្តី SBU បាននិយាយថា រយៈចម្ងាយនៃដ្រូន Sea Baby នេះ ត្រូវបានពង្រីកពី ១.០០០គីឡូម៉ែត្រ ទៅដល់ ១.៥០០គីឡូម៉ែត្រ ហើយអាចផ្ទុកបន្ទុកបានរហូតដល់ទៅ ២ពាន់គីឡូក្រាម។ នៅអំឡុងពេលហ្វឹកហ្វឺនសាកល្បង ទូកដ្រូនជាច្រើន ដែលខ្លះបំពាក់ដោយជើងបាញ់គ្រាប់រ៉ូកែតពហុមុខងារ និងខ្លះទៀតមានបំពាក់កាំភ្លើងយន្តទប់លំនឹង។

SBU បាននិយាយថា ការវាយប្រហារដោយដ្រូនត្រូវចាត់ទុកថាជាប្រតិបត្តិការដ៏ជោគជ័យប្រឆាំងនឹងនាវារុស្ស៊ីចំនួន ១១គ្រឿងមកហើយ រួមទាំងនាវាចម្បាំង និងនាវាផ្ទុកមីស៊ីល ដែលជំរុញឱ្យកងទ័ពជើងទឹករុស្ស៊ី ផ្លាស់ប្តូរទីតាំងមូលដ្ឋានសំខាន់របស់ខ្លួនពីតំបន់ Sevastopol នៅឧបទ្វីបគ្រីម៉េ ទៅតំបន់ Novorossiysk នៅលើឆ្នេរសមុទ្រខ្មៅរបស់រុស្ស៊ី៕