រុស្ស៊ីបាននិយាយកាលពីថ្ងៃពុធ ទី២២ ខែតុលា ថា ខ្លួនបានធ្វើសមយុទ្ធហ្វឹកហ្វឺនដ៏សំខាន់ពាក់ព័ន្ធនឹងអាវុធនុយក្លេអ៊ែរ មួយថ្ងៃបន្ទាប់ពីសហរដ្ឋអាមេរិកបានប្រកាសពន្យារពេលក្នុងផែនការសម្រាប់ជំនួបកំពូលលើកទីពីររវាងលោកប្រធានាធិបតី Vladimir Putin និងលោក Donald Trump ។

វិមានក្រឹមឡាំង បានបញ្ចេញវីដេអូបង្ហាញពីឧត្តមសេនីយ Valery Gerasimov នាយសេនាធិការ រាយការណ៍ដល់លោកPutin អំពីសមយុទ្ធ។

រុស្ស៊ី និយាយថា ខ្លួនបានបាញ់មីស៊ីលចេញពីជើងទម្រនៅលើដី នាវាមុជទឹក និងយន្តហោះ រួមទាំងសព្វាវុធបាលីស្ទីកអន្តរទ្វីប ដែលមានសមត្ថភាពបាញ់ដល់សហរដ្ឋអាមេរិក។

នៅក្នុងការបង្ហាញបន្ថែមទៀតពីកម្លាំង ក្រសួងការពារជាតិបាននិយាយថា យន្តហោះទម្លាក់គ្រាប់បែកយុទ្ធសាស្ត្ររយៈចម្ងាយឆ្ងាយ Tu-22M3 បានហោះនៅលើសមុទ្របាល់ទិក។

ក្នុងពេលដ៏សំខាន់នៃសង្គ្រាមនៅអ៊ុយក្រែន លោកPutin បានចេញការរំលឹកជាញឹកញាប់អំពីអាវុធនុយក្លេអ៊ែររបស់រុស្ស៊ីជាសញ្ញាព្រមានដល់ទីក្រុងគីវ និងសម្ព័ន្ធមិត្តរបស់ខ្លួននៅលោកខាងលិច។

សម្ព័ន្ធយោធា NATO ក៏បាននិងកំពុងធ្វើសមយុទ្ធទប់ស្កាត់នុយក្លេអ៊ែរក្នុងខែនេះផងដែរ។