អគ្គលេខាធិការសម្ព័ន្ធយោធាណាតូ លោក Mark Rutte បានសាទរចំពោះកិច្ចខិតខំប្រឹងប្រែងរបស់ប្រធានាធិបតីសហរដ្ឋអាមេរិក លោក Donald Trump ក្នុងការបញ្ចប់សង្រ្គាមរបស់រុស្ស៊ីជាមួយអ៊ុយក្រែន បន្ទាប់ពីជំនួបនៅសេតវិមានកាលពីថ្ងៃពុធ ទី២២ ខែតុលា។

លោក Rutte បាននិយាយទៅកាន់អ្នកសារព័ត៌មានថា មេដឹកនាំទាំងពីរបានផ្តោតសំខាន់ទៅលើរបៀបបញ្ចប់សង្រ្គាម និងរបៀបដែល NATO អាចគាំទ្រដល់ «ចក្ខុវិស័យនៃការបញ្ចប់សង្រ្គាម» របស់លោក Trump ។ លោក Rutte បាននិយាយបន្ថែមថា «ខ្ញុំគាំទ្រលោក Trump ទាំងស្រុង ហើយយើងនឹងមើលឃើញពីរបៀបដែលយើងអាចធ្វើបាន»។

លោក Trump កាលពីថ្ងៃពុធ បានដាក់ទណ្ឌកម្មទាក់ទងនឹងអ៊ុយក្រែនលើប្រទេសរុស្ស៊ីជាលើកដំបូងនៅក្នុងអាណត្តិទីពីររបស់លោក ដោយដាក់គោលដៅលើក្រុមហ៊ុនប្រេង Lukoil និង Rosneft ខណៈការខកចិត្តរបស់លោកកាន់តែខ្លាំងឡើងជាមួយប្រធានាធិបតីរុស្ស៊ីលោក Vladimir Putin ជុំវិញសង្រ្គាមនេះ។ ការដាក់ទណ្ឌកម្ម គឺជាការផ្លាស់ប្តូរគោលនយោបាយដ៏សំខាន់មួយសម្រាប់លោក Trump ជាអ្នកដែលមិនបានដាក់ទណ្ឌកម្មលើរុស្ស៊ីជុំវិញសង្រ្គាម ហើយជំនួសមកវិញដោយពឹងផ្អែកលើវិធានការពាណិជ្ជកម្ម។ លោក Trump បានដាក់ការដំឡើងពន្ធបន្ថែម២៥% លើទំនិញពីប្រទេសឥណ្ឌា ក្នុងការសងសឹកចំពោះការទិញប្រេងរបស់រុស្ស៊ីដែលបានបញ្ចុះតម្លៃ។ បន្ទាប់ពីជាប់គាំងផ្នែកការទូតជាច្រើនខែ លោកPutin និងលោក Trump បាននិយាយកាលពីសប្តាហ៍មុន និងបានប្រកាសដោយមិននឹកស្មានដល់ថាមេដឹកនាំទាំងពីនឹងរៀបចំជំនួបកំពូលនៅក្នុងប្រទេសហុងគ្រី ដែលវិមានក្រឹមឡាំងបាននិយាយថាអាចប្រព្រឹត្តទៅក្នុងរយៈពេលពីរឬបីសប្តាហ៍ខាងមុខ។ ប៉ុន្តែបន្ទាប់ពីការសន្ទនាតាមទូរស័ព្ទកាលពីដើមសប្តាហ៍នេះរវាងអ្នកការទូតជាន់ខ្ពស់របស់ប្រទេសទាំងពីរ សេតវិមានបាននិយាយថា លោក Trump គ្មានផែនការជួបជាមួយលោកPutin «ក្នុងពេលឆាប់ៗខាងមុខនេះទេ»។ លោក Trump និយាយថា លោកមិនចង់ឱ្យមានជំនួបខ្ជះខ្ជាយពេលវេលាទេ ជាអ្វីដែលវិមានក្រឹមឡាំងបាននិយាយថាលោកPutin ក៏មានបំណងបញ្ចៀសផងដែរ។