មន្ត្រីអាមេរិកម្នាក់ និងប្រភពចំនួន៣ បានឱ្យដឹងថា រដ្ឋបាលរបស់លោកប្រធានាធិបតីអាមេរិក Donald Trump កំពុងពិចារណាលើផែនការទប់ស្កាត់មួយចំនួន លើការនាំចេញផលិតផលដែលដំណើរការដោយកម្មវិធីសូហ្វវែរ (Software) ទៅកាន់ចិន រាប់ចាប់ពីកុំព្យូទ័រយួរដៃ រហូតដល់ម៉ាស៊ីនយន្តហោះ ដើម្បីសងសឹកប្រឆាំងនឹងការរឹតត្បិតនាំចេញរ៉ែកម្ររបស់ទីក្រុងប៉េកាំង។

នេះមិនមែនជាផែនការតែមួយគត់ដែលកំពុងត្រូវបានពិចារណាទេ ប៉ុន្តែការរឹតត្បិតបែបនេះនឹងស្របទៅនឹងការគំរាមកំហែងរបស់លោក Trump នៅដើមខែនេះ ក្នុងការរារាំងការនាំចេញ "សូហ្វវែរសំខាន់" ទៅកាន់ចិន ដោយរឹតបន្តឹងការដឹកជញ្ជូនទាំងឡាយទូទាំងពិភពលោក ដែលមានទំនិញទាក់ទងនឹងសូហ្វវែររបស់អាមេរិក ឬត្រូវផលិតដោយប្រើសូហ្វវែរអាមេរិក។

នៅថ្ងៃទី១០ ខែតុលា លោក Trump បាននិយាយថា លោកនឹងដាក់ពន្ធបន្ថែម ១០០% លើការដឹកជញ្ជូនរបស់ចិន ដែលមានបំណងចូលទឹកដីអាមេរិក រួមជាមួយនឹងការត្រួតពិនិត្យផ្នែកនាំចេញថ្មីលើ "សូហ្វវែរសំខាន់ៗទាំងអស់" ត្រឹមថ្ងៃទី១ ខែវិច្ឆិកា ប៉ុន្តែមិនបានបញ្ជាក់លម្អិតនោះទេ។

ប្រភពសង្កត់ធ្ងន់ថា វិធានការនេះប្រហែលជាមិនទៅមុខផ្លូវការទេ។ ទោះជាយ៉ាងនេះក្ដី ប្រភពនិយាយថា ការពិតដែលថាជំហានបែបនេះកំពុងយកទៅពិចារណា បង្ហាញច្បាស់ថា រដ្ឋបាលលោក Trump កំពុងថ្លឹងថ្លែងលើការប្រឈមមុខដាក់គ្នាផ្នែកពាណិជ្ជកម្មបន្ថែមទៀតជាមួយចិន ខណៈអ្នកមួយចំនួនក្នុងរដ្ឋាភិបាលអាមេរិក ពេញចិត្តនឹងវិធានការស្រាលដៃជាងនេះដើម្បីទប់ស្កាត់ភាពតានតឹង៕