ក្រុមគ្រូបង្រៀន គិលានុបដ្ឋាយិកា វេជ្ជបណ្ឌិត អ្នកពន្លត់អគ្គិភ័យ និងបុគ្គលិកផ្នែកគាំទ្រសេវាកម្ម សរុបប្រមាណជាង ១០០.០០០នាក់ នៅប្រទេសនូវែលសេឡង់ បានផ្អាកការងារដើម្បីប្រមូលផ្ដុំគ្នាធ្វើកូដកម្មនៅថ្ងៃព្រហស្បតិ៍ (២៣ តុលា) នេះ ដោយទាមទារឱ្យមានថវិកា និងធនធានកាន់តែច្រើនសម្រាប់វិស័យសាធារណៈ ដែលជាសញ្ញានៃការមិនសប្បាយចិត្តកាន់តែខ្លាំងឡើងជាមួយរដ្ឋាភិបាលកណ្តាលនិយមស្តាំរបស់ប្រទេស។

មន្ត្រីរាជការក៏បានដើរដង្ហែតាមដងផ្លូវ ដោយកាន់ស្លាកសញ្ញា និងបដានៅទីក្រុងនានាទូទាំងប្រទេសនូវែលសេឡង់ ដោយស្រែកពាក្យតវ៉ាផ្សេងៗ និងស្តាប់សុន្ទរកថាកូដកម្ម។ ការតវ៉ានៅទីក្រុងវែលលីងតោន និង Christchurch ត្រូវលុបចោល ដោយសារលក្ខខណ្ឌអាកាសធាតុដ៏គ្រោះថ្នាក់នៅទីនោះ។

ក្នុងសេចក្តីថ្លែងការណ៍រួមមួយកាលពីសប្តាហ៍មុន សហជីពបានហៅផែនការកូដកម្មនោះថាជាកូដកម្មដ៏ធំបំផុតក្នុងរយៈពេលជាច្រើនទសវត្សរ៍ ដែលមានមន្ត្រីរដ្ឋជាង ១០០.០០០នាក់ចូលរួម។ រដ្ឋមន្ត្រីសេវាសាធារណៈ លោកស្រី Judith Collins បាននិយាយក្នុងសេចក្តីថ្លែងការណ៍មួយកាលពីថ្ងៃពុធថា គម្រោងកូដកម្មនេះ គឺអយុត្តិធម៌ណាស់ និងមិនចាំបាច់ទាល់តែសោះ។

រដ្ឋាភិបាលបានច្រានចោលការតវ៉ានេះថាជាឆាកល្ខោននយោបាយ ដែលរៀបចំដោយសហជីព ទោះជាបាតុកម្មបានបង្ហាញពីការមិនសប្បាយចិត្តរបស់សាធារណជនចំពោះថ្នាក់ដឹកនាំក៏ដោយ។ ការស្ទង់មតិនាពេលថ្មីៗនេះបង្ហាញថា ការគាំទ្រសម្រាប់ក្រុមចម្រុះកាន់អំណាចរបស់នូវែលសេឡង់ បានធ្លាក់ចុះ៕