ហ្វីលីពីន៖ យុទ្ធនាការសម្រាប់ការបោះឆ្នោតប្រធានាធិបតីរបស់ប្រទេសហ្វីលីពីន កំពុងប្រព្រឹត្តិទៅជាផ្លូវការនៅថ្ងៃអង្គារនេះ ក្រោមការរឹតត្បិតទប់ស្កាត់ការឆ្លងរាលដាលវីរុស COVID-19 ហើយការប្រមូលផ្ដុំទ្រង់ទ្រាយធំៗកំពុងផ្លាស់ទៅធ្វើតាមបណ្ដាញសង្គមវិញ សម្រាប់ការប្រកួតប្រជែងដណ្ដើមតំណែងដ៏សំខាន់ដែលនឹងមកដល់នៅថ្ងៃទី៩ ខែឧសភា។
យុទ្ធនាការឃោសនារកសំឡេងឆ្នោតផ្លូវការរយៈពេល ៣ខែបានបើកក្រោមការរឹតត្បិតទៅលើការចាប់ដៃ ថើប ឱប និងការប្រមូលផ្ដុំមនុស្សច្រើន។ ជំងឺរាតត្បាតសកលបានបង្វែរការធ្វើយុទ្ធនាការ សម្រាប់មុខតំណែងរាប់ពាន់ចាប់ពីតំណែងប្រធានាធិបតីដល់ក្រុមប្រឹក្សាក្រុង ដោយមានបេក្ខជនជាច្រើនត្រូវផ្លាស់ប្ដូរសកម្មភាពរបស់ខ្លួនធ្វើតាម Online ដើម្បីបានទៅដល់ប្រជាជនគ្រប់គ្នា ដែលចាត់ទុកជាប្រទេសអ្នកប្រើបណ្ដាញសង្គមដ៏ធំបំផុតមួយ ក្នុងចំណោមប្រទេសជាច្រើននៅលើពិភពលោក។
បេក្ខជនសម្រាប់មុខតំណែងជាច្រើនក្នុងឃុំសង្កាត់របស់ពួកគេ រួមទាំងអភិបាលខេត្ត ក្រុង និងតំណាងរាស្ត្រនឹងបើកយុទ្ធនាការនៅថ្ងៃទី២៥ ខែមីនា ក្រោមការឃ្លាំមើលយ៉ាងយកចិត្តទុកដាក់ពីនគរបាល ដោយសារតែធ្លាប់មានប្រវត្តិផ្ទុះអំពើហិង្សារវាងគូប្រជែងរបស់ខ្លួន។ ជនជាតិហ្វីលីពីនជាង ៦៧លាននាក់បានចុះឈ្មោះបោះឆ្នោតរួចរាល់ រួមទាំងជិត ១,៧លាននាក់ដែលបានធ្វើការនៅបរទេសផងដែរ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
