ព្រឹទ្ធសភាសហរដ្ឋអាមេរិក បានច្រានចោលជាថ្មីម្ដងទៀតនូវសំណើច្បាប់ផ្តល់មូលនិធិបណ្តោះអាសន្ន ដែលគាំទ្រដោយគណបក្សសាធារណរដ្ឋ កាលពីថ្ងៃពុធ (២២ តុលា) ក្នុងសំឡេង ៥៤ទល់នឹង៤៦ ដែលទុកឱ្យរដ្ឋាភិបាលអាមេរិក បន្តបិទដំណើរការ ហើយភាពជាប់គាំងនៅតែមិនត្រូវដោះស្រាយ។ នេះជាលើកទី១២ហើយ ដែលព្រឹទ្ធសភាបានបោះឆ្នោតរារាំងវិធានការដើម្បីបើករដ្ឋាភិបាលឡើងវិញរយៈពេលខ្លី បន្ទាប់ពីការបិទដំបូងបានចាប់ផ្ដើមនៅដើមខែតុលា នេះមក។

ភាពជាប់គាំងនេះកើតចេញពីការខ្វែងគំនិតគ្នាយ៉ាងស៊ីជម្រៅរវាងអ្នកសាធារណរដ្ឋ និងអ្នកប្រជាធិបតេយ្យលើបញ្ហាសំខាន់ៗ ដូចជាការចំណាយលើសុខុមាលភាពទាក់ទងនឹងការថែទាំសុខភាពជាដើម។ ព្រឹទ្ធសភាបានបរាជ័យក្នុងការអនុម័តសំណើផ្តល់មូលនិធិថ្មី មុនឆ្នាំសារពើពន្ធមុនបញ្ចប់នៅថ្ងៃទី៣០ ខែកញ្ញា ទើបបណ្តាលឱ្យរដ្ឋាភិបាលអស់ថវិកាប្រតិបត្តិការ ហើយក៏បានបិទចាប់ពីថ្ងៃទី១ ខែតុលា មក។

ការបិទរដ្ឋាភិបាលនៅឆ្នាំ២០២៥នេះ បានក្លាយជារយៈពេលវែងបំផុតទីពីរក្នុងប្រវត្តិសាស្ត្រអាមេរិក កាលពីថ្ងៃពុធ ទី២២ ខែតុលា កន្លងទៅ បន្ទាប់ពីភាពជាប់គាំងស្រដៀងគ្នានេះអំឡុងឆ្នាំ១៩៩៥-១៩៩៦។ ចាប់តាំងពីដើមខែតុលា ឆ្នាំ២០២៥មក កម្មករសហព័ន្ធរាប់ពាន់នាក់ត្រូវឈប់សម្រាកពីការងារ ឬធ្វើការដោយគ្មានប្រាក់ឈ្នួល ខណៈសេវារដ្ឋាភិបាលត្រូវកាត់បន្ថយ ឬផ្អាកទាំងស្រុង៕