ប្រមុខក្រុមប្រឹក្សារៀបចំការបោះឆ្នោតរបស់ហៃទី បានប្រាប់សារព័ត៌មានរ៉យទ័រកាលពីថ្ងៃពុធ (២២ តុលា) ថា ប្រទេសហៃទី នឹងមិនរៀបចំការបោះឆ្នោតសកល នៅមុនការបញ្ចប់អាណត្តិរបស់រដ្ឋាភិបាលបណ្តោះអាសន្នបច្ចុប្បន្នក្នុងខែកុម្ភៈ ឆ្នាំក្រោយនេះទេ ដោយសារការពង្រីកខ្លួន និងអំពើហិង្សារបស់ក្រុមជនអន្ធពាលប្រដាប់អាវុធ ធ្វើឱ្យក្តីសង្ឃឹមសម្រាប់ការបោះឆ្នោតពេញលេញ និងមានស្ថិរភាព ដែលទន្ទឹងរង់ចាំជាយូរ មិនអាចទៅរួចឡើយ។

ប្រទេសដែលមានប្រជាជនច្រើនជាងគេនៅសមុទ្រការ៉ាអ៊ីបមួយនេះ មិនបានរៀបចំការបោះឆ្នោតទាល់តែសោះ ចាប់តាំងពីឆ្នាំ២០១៦មក។ ប្រធានាធិបតីចុងក្រោយបង្អស់របស់ខ្លួន ដែលបានលើកពេលបោះឆ្នោតម្តងហើយម្តងទៀត ត្រូវគេធ្វើឃាតនៅឆ្នាំ២០២១ ហើយក្រោយមក ក្រុមជនពាលប្រដាប់អាវុធបានកាន់កាប់ផ្នែកភាគច្រើននៃរដ្ឋធានី និងតំបន់ជុំវិញនោះ ដែលធ្វើឱ្យហិង្សារីករាលដាល។

ប្រធានក្រុមប្រឹក្សាបោះឆ្នោត លោក Jacques Desrosiers បាននិយាយថា "ហៃទីនៅមិនអាចរៀបចំការបោះឆ្នោតមុនខែកុម្ភៈបានទេ ព្រោះដំណើរការនេះមិនអាចទៅរួចឡើយ"។

រដ្ឋាភិបាលបណ្តោះអាសន្នធ្លាប់និយាយថា ខ្លួនមានគម្រោងធ្វើការបោះឆ្នោតនៅថ្ងៃទី១៥ ខែវិច្ឆិកា នៃឆ្នាំ២០២៥នេះ ពោលគឺឱ្យបានមុនថ្ងៃទី៧ ខែកុម្ភៈ ឆ្នាំក្រោយ ដែលជាថ្ងៃបញ្ចប់នៃអាណត្តិក្រុមប្រឹក្សាប្រធានាធិបតីអន្តរកាលមួយនេះ ដែលបានចូលកាន់អំណាចនៅខែមេសា ឆ្នាំ២០២៤៕