រដ្ឋមន្ត្រីការបរទេសអាមេរិក លោក Marco Rubio កាលពីថ្ងៃពុធ (ទី២២ ខែតុលា) នេះ បានព្រមានអ៊ីស្រាអែល កុំបញ្ចូលតំបន់ West Bank ជាដែនដីឧបសម្ព័ន្ធ ដោយនិយាយថា ចំណាត់ការដែលធ្វើឡើងដោយសភា និងអំពើហិង្សារបស់អ្នកតាំងទីលំនៅ បានគំរាមកំហែងដល់កិច្ចព្រមព្រៀងសន្តិភាពហ្កាហ្សា។

គួរបញ្ជាក់ថា សមាជិកសភាអ៊ីស្រាអែលបានបោះឆ្នោតកាលពីថ្ងៃពុធ ដើម្បីពន្លឿនសេចក្តីព្រាងច្បាប់ចំនួន ២ ស្តីពីការបញ្ចូលតំបន់កាន់កាប់ West Bank ជាដែនដីឧបសម្ព័ន្ធ ដោយនេះកើតមានឡើងស្ទើរតែមិនដល់ ១សប្តាហ៍ផងបន្ទាប់ពីលោកប្រធានាធិបតី Donald Trump បានប្រឹងប្រែងជំរុញកិច្ចព្រមព្រៀងឲ្យកើតឡើង ដោយមានគោលបំណងបញ្ចប់សង្រ្គាមរបស់អ៊ីស្រាអែលរយៈពេល ២ឆ្នាំ នៅតំបន់ហ្កាហ្សាស្ទ្រីប។

ក្នុងអំឡុងពេលនិយាយអំពីការបញ្ចូលជាដែនដីឧបសម្ព័ន្ធនេះ នៅពេលលោកឡើងយន្តហោះ សម្រាប់ដំណើរទស្សនកិច្ចទៅកាន់ប្រទេសអ៊ីស្រាអែល លោក Rubio បានបញ្ជាក់ថា៖ «ខ្ញុំគិតថា លោកប្រធានាធិបតី បានបញ្ជាក់យ៉ាងច្បាស់ហើយថា មិនមែនជាអ្វីដែលយើងអាចគាំទ្របាននៅពេលនេះទេ»។ លោកបានប្រាប់ក្រុមអ្នកសារព័ត៌មានទៀតថា៖ «វិធានការដាក់ជាដីដែនឧបសម្ព័ន្ធនេះ កំពុងតែគំរាមកំហែងដល់កិច្ចព្រមព្រៀងសន្តិភាព»។

លោកបានបន្ថែមថា៖ «ពួកគេជាអ្នកប្រជាធិបតេយ្យ ពួកគេនឹងត្រូវមានសំឡេងឆ្នោត ហើយប្រជាជននឹងប្រើសិទ្ធិសម្រេចនូវគោលជំហរទាំងនេះ។ ប៉ុន្តែពេលនេះ វាជាអ្វីដែលយើងគិតថា អាចនឹងមិនមានផលល្អឡើយ»។

នៅពេលត្រូវបានសួរអំពីការកើនឡើងនូវអំពើហិង្សា ដែលបង្កឡើងដោយអ្នកតាំងលំនៅអ៊ីស្រាអែលជ្រុលនិយមលើជនជាតិប៉ាឡេស្ទីន នៅតំបន់ West Bank លោក Rubio បានឆ្លើយតបថា៖ «យើងព្រួយបារម្ភអំពីអ្វីដែលគំរាមកំហែងបង្កអស្ថិរភាពដល់អ្វីដែលយើងបានធ្វើឲ្យប្រសើរឡើង»៕