នាយករដ្ឋមន្ត្រីជប៉ុនដែលទើបតែងតាំងថ្មី លោកស្រី Sanae Takaichi បានចាប់ផ្តើមអាណត្តិរបស់លោកស្រី ដោយមានការគាំទ្រខ្ពស់ ជាការបង្ហាញពីសុទិដ្ឋិនិយម ដែលថា លោកស្រីអាចបំពេញតាមការសន្យានានា ដែលរួមមានទាំងការទប់ទល់នឹងអតិផរណា និងការពង្រឹងសេដ្ឋកិច្ចផងដែរ។

លោកស្រី Takaichi បានសន្យាថា នឹងធ្វើការងារបន្ថែមទៀត សម្រាប់គ្រួសារដែលជួបលំបាក ដោយមានការចំណាយខ្ពស់ និងត្រូវបានគេស្គាល់ថា ជាអ្នកពង្រីកសារពើពន្ធនិយម។ រដ្ឋាភិបាលរបស់លោកស្រី ដែលលោកស្រីបានកោះប្រជុំកាលពីថ្ងៃទី២១ ខែតុលា កំពុងធ្វើការរួចហើយ ស្ដីពីកញ្ចប់សេដ្ឋកិច្ចដែលមានគោលបំណងសម្រាលបន្ទុកអតិផរណាលើគ្រួសារ និងក្រុមហ៊ុននានា។

បើយោងតាមការស្ទង់មតិដែលធ្វើឡើងនៅដើមសប្តាហ៍នេះដោយទីភ្នាក់ងារសារព័ត៌មាន Kyodo បានឲ្យដឹងថា ការគាំទ្រជាសាធារណៈ ចំពោះគណៈរដ្ឋមន្ត្រីរបស់លោកស្រី គឺ ៦៤,៤ភាគរយ។ អ្នកឆ្លើយតប ២៦,៦ភាគរយ បាននិយាយថា ហេតុផលដែលពួកគេគាំទ្ររដ្ឋាភិបាលនេះ គឺដោយសារតែពួកគេជឿទុកចិត្តលើលោកស្រី Takaichi ខណៈដែល ២២,៥ភាគរយ បានប្រាប់ថា ពួកគេមានក្តីសង្ឃឹមខ្ពស់ ចំពោះគោលនយោបាយសេដ្ឋកិច្ចរបស់លោកស្រី។ ចំណែកការស្ទង់មតិដាច់ដោយឡែកមួយដោយសារព័ត៌មាន Yomiuri បានបង្ហាញពីកម្រិតគាំទ្រ ៧១ភាគរយ។

កម្រិតនោះធ្វើឲ្យអត្រាការគាំទ្រលោកស្រី គឺខ្ពស់ជាងការស្ទង់មតិដំបូង សម្រាប់រដ្ឋាភិបាលអ្នកកាន់តំណែងមុនរបស់លោកស្រី គឺលោក Shigeru Ishiba និងលោក Fumio Kishida ដែលមានអត្រាគាំទ្រសាធារណៈ ៥០,៧ភាគរយ និង ៥៥,៧ភាគរយរៀងគ្នា នៅក្នុងការស្ទង់មតិរបស់សារព័ត៌មាន Kyodo។ លទ្ធផលនេះក៏បង្ហាញផងដែរថា រហូតមកដល់ពេលនេះ ការជ្រើសរើសលោកស្រី Takaichi ជាមេដឹកនាំ បានទាក់ទាញអ្នកបោះឆ្នោតវ័យក្មេងប្រកបដោយជោគជ័យ៕