មេដឹកនាំសហភាពអឺរ៉ុប (EU) នៅថ្ងៃព្រហស្បតិ៍ (ទី២៣ ខែតុលា) នេះ នឹងទំនងជាអាចបើកភ្លើងខៀវដល់លទ្ធភាពផ្ដល់ប្រាក់កម្ចីថ្មីដ៏ច្រើនសន្ធឹកសន្ធាប់ដល់អ៊ុយក្រែន ដោយប្រើប្រាស់ទ្រព្យសម្បត្តិរបស់រុស្ស៊ីដែលត្រូវបានបង្ក ជាការប៉ុនប៉ងជួយជំរុញដល់ការគាំទ្រទីក្រុងគីវ នៅពេលដែលកិច្ចប្រឹងប្រែងសន្តិភាពជាមួយទីក្រុងមូស្គូរបស់ប្រធានាធិបតីអាមេរិក លោក Donald Trump ហាក់មិនទៅមុខ។

ប្រធានាធិបតីអ៊ុយក្រែន លោក Volodymyr Zelenskyy នឹងចូលរួមកិច្ចប្រជុំកំពូលមេដឹកនាំនៃប្រទេសសមាជិកទាំង ២៧ របស់ EU នៅទីក្រុងប្រ៊ុចសែល ប្រទេសបែលហ្ស៊ិក មុនពេលធ្វើដំណើរទៅកាន់ទីក្រុងឡុងដ៍្រ ប្រទេសអង់គ្លេស នៅថ្ងៃសុក្រ ខណៈដែលអឺរ៉ុបកំពុងប្រឹងប្រែងពង្រឹងការគាំទ្រ បន្ទាប់ពីលោក Trump បានលុបចោលគម្រោងមានជំនួបកំពូលជាមួយប្រធានាធិបតីរុស្ស៊ី លោក Vladimir Putin នៅទីក្រុង Budapest ប្រទេសហុងគ្រី។

លោក Zelenskyy និងក្រុមអ្នកគាំទ្រសំខាន់ៗរបស់លោក កំពុងប្រឹងប្រែងទាញយកផលពីការទាមទាររបស់លោក Trump ដែលចង់ឲ្យរុស្ស៊ី និងអ៊ុយក្រែនបញ្ឈប់ការប្រយុទ្ធគ្នា ត្រឹមតំបន់ជួរមុខបច្ចុប្បន្ន ហើយប្តូរការទទួលខុសត្រូវពីទីក្រុងគីវ ទៅទីក្រុងមូស្គូវិញ ក្នុងការធ្វើសម្បទាន។

ក្ដីសង្ឃឹម ដែលថា Trump អាចចាត់វិធានការប្រឆាំងលោក Putin បានកើនឡើង កាលពីថ្ងៃពុធ នៅពេលដែលរដ្ឋមន្ត្រីក្រសួងរតនាគារអាមេរិក លោក Scott Bessent បាននិយាយថា ទីក្រុងវ៉ាស៊ីនតោននឹងបង្ហាញ «វិធានការយ៉ាងខ្លាំងក្លា» នៅក្នុងការដាក់ទណ្ឌកម្មលើរុស្ស៊ី ហើយបានចោទប្រកាន់មេដឹកនាំរុស្ស៊ីថា មិន «ស្មោះត្រង់ និងមិននិយាយឲ្យបានច្បាស់» នៅក្នុងកិច្ចពិភាក្សា។

ខណៈពេលដែលកិច្ចពិភាក្សា នៅក្នុងរដ្ឋធានីរបស់ចក្រភពអង់គ្លេស មើលទៅនឹងផ្តោតបន្ថែមទៀត លើវិធានការពាក់ព័ន្ធមិនអាចទាយទុកបានរបស់មេដឹកនាំអាមេរិកនោះ កិច្ចប្រជុំកំពូល នៅទីក្រុងប្រ៊ុចសែល នឹងផ្តោតជាសំខាន់ លើវិធីបន្តផ្តល់មូលនិធិដល់អ៊ុយក្រែន និងដាក់សម្ពាធបន្ថែមទៀតលើទីក្រុងមូស្គូ៕