លោកប្រធានាធិបតី Donald Trump និងសមភាគីកូឡុំប៊ី លោក Gustavo Petro បានធ្វើការគំរាមកំហែងយ៉ាងខឹងសម្បាដាក់គ្នាទៅវិញទៅមក កាលពីថ្ងៃពុធ (ទី២២ ខែតុលា) ខណៈដែលសហរដ្ឋអាមេរិកបានប្រកាសពីការវាយប្រហារលើទូកសង្ស័យរត់ពន្ធគ្រឿងញៀនចំនួន ២គ្រឿង នៅមហាសមុទ្រប៉ាស៊ីហ្វិកដែលបានបណ្តាលឲ្យមនុស្ស ៥នាក់ បាត់បង់ជីវិត។

លោក Trump បានដាក់ឈ្មោះលោក Petro ថា ជា «ជនទុច្ចរិច» ហើយបានលើកឡើងថា លោកគឺជាអ្នកជួញដូរគ្រឿងញៀនដែលនាំឲ្យប្រទេសរបស់លោកត្រូវវិនាស ដោយជំរុញឲ្យមេដឹកនាំឆ្វេងនិយមប្ដេជ្ញាថា «នឹងការពារខ្លួនដោយផ្លូវច្បាប់ដោយមេធាវីអាមេរិក»។

ជាមួយគ្នានេះ លោកប្រធានាធិបតីអាមេរិក ក៏បានបញ្ជាក់ផងដែរថា ការផ្ដល់ជំនួយផ្នែកយោធាដ៏សំខាន់ដល់ទីក្រុង Bogota ត្រូវបានកាត់បន្ថយ ហើយបានព្រមាន លោក Petro ដែលជាអ្នករិះគន់យ៉ាងខ្លាំងចំពោះការវាយប្រហារនេះ ឲ្យ «ប្រយ័ត្នប្រយែង» ខណៈដែលរដ្ឋមន្ត្រីការបរទេស លោក Marco Rubio បានហៅមេដឹកនាំកូឡុំប៊ីថា «មនុស្សឥតវិចារណញ្ញាណ»។

ទន្ទឹមនឹងនេះ តាមរយៈការបង្ហោះលើបណ្ដាញសង្គមដែលបង្ហាញពីនាវាកំពុងត្រូវបានឆាបឆេះដោយអណ្តាតភ្លើង រដ្ឋមន្ត្រីការពារជាតិ លោក Pete Hegseth បានប្រកាសពីការវាយប្រហារលើទូក ២គ្រឿង នៅប៉ាស៊ីហ្វិក ដោយ ១គ្រឿង នៅថ្ងៃពុធ និង ១ទៀតនៅមួយថ្ងៃមុននោះ។

គួរបញ្ជាក់ថា ភាពតានតឹងក្នុងតំបន់បានផ្ទុះឡើង ដោយប្រទេសកូឡុំប៊ីបានកោះហៅឯកអគ្គរដ្ឋទូតរបស់ខ្លួន ប្រចាំទីក្រុងវ៉ាស៊ីនតោន ហើយវ៉េណេស៊ុយអេឡា បានចោទប្រកាន់សហរដ្ឋអាមេរិកពីបទរៀបចំផែនការផ្តួលរំលំប្រធានាធិបតីលោក Nicolas Maduro ដែលបាននិយាយកាលពីថ្ងៃពុធថា ប្រទេសរបស់លោកមានមីស៊ីលបាញ់ពីដីទៅអាកាសរបស់រុស្ស៊ីចំនួន ៥.០០០គ្រាប់ ដើម្បីទប់ទល់នឹងកងកម្លាំងសហរដ្ឋអាមេរិក ដែលកំពុងដាក់ពង្រាយនៅតំបន់ការ៉ាអ៊ីព ជាកិច្ចប្រឹងប្រឹងដែលទីក្រុងវ៉ាស៊ីនតោនប្រាប់ថា ដើម្បីប្រយុទ្ធប្រឆាំងនឹងការជួញដូរគ្រឿងញៀន៕