ប្រទេសឥណ្ឌាបានស្នើឡើងនូវបទប្បញ្ញត្តិថ្មី ដើម្បីគ្រប់គ្រងបញ្ញាសិប្បនិម្មិត (AI) ក្នុងគោលបំណងទប់ស្កាត់ការកើនឡើងយ៉ាងខ្លាំងនូវព័ត៌មានមិនពិត និងវីដេអូក្លែងក្លាយ នៅក្នុងប្រទេសដែលមានប្រជាជនច្រើនជាងគេបំផុតរបស់ពិភពលោកមួយនេះ។

ក្រសួងព័ត៌មានវិទ្យា បានប្រកាសអំពីសំណើធ្វើវិសោធនកម្ម ដោយលើកឡើងពី «ការកើនឡើងនូវការប្រើប្រាស់បច្ចេកវិទ្យាមិនត្រឹមត្រូវ ដើម្បីធ្វើការបង្កើត ឬផលិតព័ត៌មានក្លែងក្លាយ»។

កំណត់សម្គាល់ព័ត៌មានពីក្រសួងដែលបានចេញផ្សាយកាលពីយប់ថ្ងៃពុធ (ទី២២ ខែតុលា) បានឲ្យដឹងថា៖ «ឧប្បត្តិហេតុថ្មីៗនេះ ពាក់ព័ន្ធនឹងសំឡេង វីឌីអូ និងបណ្ដាញព័ត៌មានក្លែងក្លាយ ដែលកំពុងតែរីករាលដាលនៅលើវេទិកាបណ្ដាញសង្គម បានបង្ហាញពីសក្ដានុពលនៃបច្ចេកវិទ្យា AI ក្នុងការបង្កើតភាពក្លែងក្លាយដែលគួរឲ្យជឿជាក់បាន»។

កំណត់សម្គាល់នោះបានបន្ថែមថា៖ «ខ្លឹមសារបែបនេះ អាចត្រូវបានប្រើជាអាវុធ ដើម្បីផ្សព្វផ្សាយព័ត៌មានមិនពិត ធ្វើឲ្យខូចកេរ្តិ៍ឈ្មោះ រៀបចំ ឬមានឥទ្ធិពលលើការបោះឆ្នោត ឬប្រព្រឹត្តការក្លែងបន្លំផ្នែកហិរញ្ញវត្ថុ»។

គួរបញ្ជាក់ថា បើយោងតាមសមាគមអ៊ីនធឺណិត និងទូរសព្ទរបស់ប្រទេសឥណ្ឌា បានឲ្យដឹងថា ឥណ្ឌាមានអ្នកប្រើអ៊ីនធឺណិតជាង ៩០០លាននាក់។ ចិនមានអ្នកប្រើអ៊ីនធឺណិតច្រើនជាង ប៉ុន្តែឥណ្ឌាបើកចំហជាង ចំពោះក្រុមហ៊ុនបច្ចេកវិទ្យាអាមេរិក៕