ប្រទេសដែលក្មេងខ្ចីជាងគេ នៅអាស៊ី គឺទីម័រខាងកើត ឬទីម័រលេស្ដេរ នឹងសម្រេចបាននូវក្តីសុបិនដ៏យូរជាច្រើនទស្សវត្សរ៍ នៅពេលដែលខ្លួនក្លាយជាសមាជិកទី១១ នៃសមាគមប្រជាជាតិអាស៊ីអាគ្នេយ៍ ឬអាស៊ាន (ASEAN) នៅចុងសប្តាហ៍នេះ ជាអ្វីដែលអ្នកវិភាគលើកឡើងថា ជាជោគជ័យផ្នែកនយោបាយ ទោះបីជាផលប្រយោជន៍ផ្នែកសេដ្ឋកិច្ច នៅតែត្រូវបានគេមើលឃើញថា មិនមានភាពច្បាស់លាស់ក៏ដោយ។

ទីម័រខាងកើត ដែលជាប្រទេសក្រីក្របំផុត នៅតំបន់អាស៊ីអាគ្នេយ៍ និងធំជាងប្រទេសកាតាបន្តិចនោះ បានដាក់ពាក្យចូលរួមជាមួយសមាគមប្រជាជាតិអាស៊ីអាគ្នេយ៍ ដែលមានសមាជិក ១០ប្រទេស ក្នុងឆ្នាំ២០១១ ហើយត្រូវបានផ្តល់ឋានៈជាអ្នកសង្កេតការណ៍ នៅឆ្នាំ២០២២។

ប្រទេសដែលមានប្រជាជន ១,៤លាននាក់នេះ បានទទួលបានឯករាជ្យនៅឆ្នាំ២០០២ ពីប្រទេសជិតខាងឥណ្ឌូនេស៊ី បន្ទាប់ពីមានការបោះឆ្នោតប្រជាមតិឆ្នាំ១៩៩៩ ដែលត្រួតពិនិត្យមើលខុសត្រូវដោយអង្គការសហប្រជាជាតិ (UN) ហើយមានព្រំប្រទល់ជាប់នឹងខេត្ត East Nusa Tenggara របស់ឥណ្ឌូនេស៊ី។

បុគ្គល ២រូប ក្នុងចំណោមវីរបុរសទាមទារឯករាជ្យរបស់ប្រទេស ឥឡូវនេះ បានដឹកនាំប្រទេស គឺលោកប្រធានាធិបតី Jose Ramos-Horta ដែលបានឈ្នះរង្វាន់ណូបែលសន្តិភាព ក្នុងឆ្នាំ១៩៩៦ សម្រាប់ការប្រឹងប្រែងរបស់លោក និងលោកនាយករដ្ឋមន្ត្រី Xanana Gusmao។

ជាច្រើនទស្សវត្សរ៍បន្ទាប់ពីលោក Ramos-Horta បានលើកឡើងពីគំនិតនៃការចូលរួមជាមួយអាស៊ាន ក្នុងទសវត្សរ៍ឆ្នាំ១៩៧០ នៅពេលដែលទីម័រខាងកើតនៅតែស្ថិតក្រោមអាណានិគមរបស់ព័រទុយហ្គាល់ ប្រទេសនេះនឹងត្រូវបានក្លាយជាសមាជិកផ្លូវការ នៅក្នុងកិច្ចប្រជុំកំពូលនៃបណ្ដាមេដឹកនាំប្រទេស នៅតំបន់អាស៊ាន នាថ្ងៃទី២៦ ដល់ថ្ងៃទី២៨ ខែតុលា ដែលម៉ាឡេស៊ីធ្វើជាប្រធាន។

ទីម័រខាងកើតកំពុងព្យាយាមធ្វើពិពិធកម្មសេដ្ឋកិច្ចជិត ២ពាន់លានដុល្លារអាមេរិករបស់ខ្លួន ឲ្យងាកចេញពីការពឹងផ្អែកខ្លាំងលើធានធានបម្រុងប្រេង និងឧស្ម័នដែលកំពុងថមថយបរិមាណ។ បណ្ដាអ្នកវិភាគលើកឡើងថា ការចូលជាសមាជិកអាស៊ាននេះ នឹងផ្តល់អត្ថប្រយោជន៍ដល់សមាជិកថ្មីបំផុតរបស់សមាគមនេះ ប៉ុន្តែពួកគេបារម្ភថា តើប្រទេសនេះនឹងទទួលបានផលប្រយោជន៍យ៉ាងដូចម្ដេច ក្នុងនាមជាប្រទេសមានសេដ្ឋកិច្ចតូចបំផុតរបស់ប្លុក៕