រុស្ស៊ី នៅថ្ងៃព្រហស្បតិ៍ (ទី២៣ ខែតុលា) នេះ បានឲ្យដឹងថា ការដាក់ទណ្ឌកម្មថ្មីរបស់សហរដ្ឋអាមេរិកលើឧស្សាហកម្មប្រេងរបស់ខ្លួន បានបង្កជាហានិភ័យដល់កិច្ចប្រឹងប្រែងការទូត ដើម្បីបញ្ចប់សង្គ្រាម នៅអ៊ុយក្រែន ហើយថា ខ្លួនបានបង្កើត «នូវប្រព័ន្ធភាពស៊ាំយ៉ាងរឹងមាំ» ដើម្បីទប់ទល់នឹងចំណាត់ការទាំងនេះ។

គួរដឹងថា ប្រធានាធិបតីអាមេរិក លោក Donald Trump បានប្រកាសដាក់ទណ្ឌកម្មថ្មីលើក្រុមហ៊ុនប្រេងធំៗចំនួន ២ របស់រុស្ស៊ី កាលពីថ្ងៃពុធ ដោយបានពោលពាក្យក្នុងន័យធុញទ្រាន់ថា កិច្ចចរចាសន្តិភាពរបស់លោកជាមួយមេដឹកនាំរុស្ស៊ី លោក Vladimir Putin មិនមានវឌ្ឍនភាពអ្វីសោះ។

លោក Trump បានបញ្ឈប់ការដាក់ចេញនូវការរឹតបន្តឹងថ្មីលើរុស្ស៊ីអស់រយៈពេលជាច្រើនខែមកហើយ ប៉ុន្តែភាពអត់ធ្មត់របស់លោក បានដល់ទីបញ្ចប់ បន្ទាប់ពីគម្រោងរៀបចំជំនួបកំពូលថ្មីជាមួយលោក Putin នៅទីក្រុង Budapest ប្រទេសហុងគ្រី បានដួលរលំ។

យ៉ាងណាក្ដី អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova បានប្រាប់សន្និសីទសារព័ត៌មានប្រចាំសប្តាហ៍ថា៖ «យើងចាត់ទុកវិធានការនេះថា ជាការរារាំងដល់ផលប្រយោជន៍នានា ដែលមានរួមទាំងផ្នែកតម្រូវការ ដើម្បីសម្រេចបាននូវដំណោះស្រាយអាចទទួលយកបានពីគ្រប់ភាគី ចំពោះជម្លោះអ៊ុយក្រែនផងដែរ»។

លោកស្រីបានបន្ថែមថា៖ «ប្រទេសរបស់យើងបានបង្កើតនូវប្រព័ន្ធភាពស៊ាំដ៏រឹងមាំ ដើម្បីទប់ទល់នឹងការរឹតបន្តឹងរបស់លោកខាងលិច ហើយនឹងបន្តអភិវឌ្ឍសក្តានុពលសេដ្ឋកិច្ចរបស់ខ្លួន ប្រកបដោយទំនុកចិត្ត ក្នុងនោះរួមទាំងសក្តានុពលថាមពលផងដែរ»៕