នៅថ្ងៃព្រហស្បតិ៍ (ទី២៣ ខែតុលា) នេះ លោកប្រធានាធិបតីអ៊ុយក្រែន Volodymyr Zelenskyy បានជំរុញឲ្យសម្ព័ន្ធមិត្តអឺរ៉ុបយល់ព្រមផ្គត់ផ្គង់ដល់ប្រទេសរបស់លោកនូវអាវុធរយៈចម្ងាយឆ្ងាយ បន្ទាប់ពីមិនអាចទទួលបានការសន្យាពីប្រធានាធិបតីអាមេរិក លោក Donald Trump ក្នុងការផ្តល់ឲ្យទីក្រុង Kyiv នូវមីស៊ីល Tomahawk ដ៏មានឥទ្ធិពលខ្លាំងក្លា។

ជាមួយគ្នានេះ លោក Zelenskyy ដែលបានថ្លែងទៅកាន់មេដឹកនាំសហភាពអឺរ៉ុប (EU) នៅទីក្រុងប្រ៊ុចសែល ប្រទេសបែលហ្ស៊ិក ក៏បានអំពាវនាវឲ្យមេដឹកនាំទាំងនោះយល់ព្រមឲ្យបានឆាប់តាមដែលអាច ជុំវិញផែនការប្រើប្រាស់ទ្រព្យសម្បត្តិរបស់រុស្ស៊ីដែលត្រូវបានបង្កក ហើយបាននិយាយថា ទីក្រុងគីវ នឹងប្រើប្រាស់ «ផ្នែកដ៏ធំ» នៃមូលនិធិណាមួយដែលមាន ដើម្បីទិញអាវុធផលិតនៅអឺរ៉ុប។

លោកបានបញ្ជាក់ទៀតថា៖ «នៅពេលយើងនិយាយអំពីអាវុធរយៈចម្ងាយឆ្ងាយ សម្រាប់អ៊ុយក្រែន យើងមានន័យថា របបរបស់លោក (Vladimir) Putin គួរតែទទួលរងនូវផលវិបាកពិតប្រាកដពីសង្រ្គាមនេះ។ ខ្ញុំសូមជំរុញអ្នកគាំទ្រនូវអ្វីគ្រប់យ៉ាងដែលជួយអ៊ុយក្រែនឲ្យទទួលបានសមត្ថភាពបែបនេះ ដ្បិតវាពិតជាធ្វើឲ្យមានការផ្លាស់ប្តូរ ចំពោះរុស្ស៊ី»។

លោកបាននិយាយបន្ថែម ដោយសង្កត់ធ្ងន់ថា៖ «សូមត្រឹមតែគិតមើលថា តើលោក (ប្រធានាធិបិបតីរុស្ស៊ី) Putin ភ័យតក់ប្រមាប៉ុនណា នៅពេលដែលប្រធានបទនេះលេចឡើង។ គាត់យល់ថា អាវុធរយៈចម្ងាយឆ្ងាយ ពិតជាអាចផ្លាស់ប្តូរទិសដៅរបស់សង្រ្គាមបាន»។

គួរបញ្ជាក់ថា លោក Zelenskyy បានកំពុងប្រឹងប្រែងឲ្យទទួលបានមីស៊ីល Tomahawk ពីសហរដ្ឋអាមេរិក។ លោក Trump មិនបានច្រានចោលឡើយនូវការផ្តល់ឲ្យទីក្រុងគីវនូវមីស៊ីលបែបនេះ ក្នុងអំឡុងពេលមានកិច្ចពិភាក្សា នៅទីក្រុងវ៉ាស៊ីនតោន ជាមួយ Zelenskyy កាលពីសប្តាហ៍មុន ប៉ុន្តែហាក់ដូចជាមិនផ្ដល់ភាពច្បាស់លាស់ដល់ការរំពឹងទុកនោះទេ៕