ប្រធានាធិបតីប្រេស៊ីល លោក Luiz Inacio Lula da Silva បាននិយាយនៅថ្ងៃព្រហស្បតិ៍ (ទី២៣ ខែតុលា) នេះថា លោកនឹងឈរឈ្មោះ ដើម្បីជាប់ឆ្នោតឡើងវិញ នៅឆ្នាំក្រោយ ដែលជាការស្វែងរកការកាន់តំណែងអាណត្តិទី៤។

អំឡុងពេលថ្លែងក្នុងដំណើរទស្សនកិច្ចផ្លូវរដ្ឋ នៅប្រទេសឥណ្ឌូនេស៊ី ជាមួយប្រធានាធិបតី លោក Prabowo Subianto លោក Lula បាននិយាយថា លោកនៅតែមានកម្លាំងរឹងមាំ ទោះបីជាលោកមានអាយុច្រើនក៏ដោយ។ លោក Lula បានប្រាប់ថា៖ «ខ្ញុំនឹងមានអាយុ ៨០ឆ្នាំ ប៉ុន្តែខ្ញុំមានកម្លាំងរឹងមាំដូចគ្នានឹងពេលដែលខ្ញុំមានអាយុ ៣០ឆ្នាំអ៊ីចឹង។ ខ្ញុំនឹងឈរឈ្មោះប្រកួតប្រជែង សម្រាប់អាណត្តិទី៤ នៅប្រេស៊ីល»។

អាណត្តិបច្ចុប្បន្នរបស់លោក នឹងបញ្ចប់នៅចុងឆ្នាំ២០២៦។ មេដឹកនាំឆ្វេងនិយមរូបនេះ បានឈ្នះការបោះឆ្នោតប្រធានាធិបតីចំនួន ៣ដងរួចមកហើយ ពោលគឺក្នុងឆ្នាំ២០០២ ២០០៦ និង ២០២២។

កាលពីដើមឆ្នាំនេះ លោក Lula បានបង្ហើបរួចហើយ អំពីលទ្ធភាពនៃការស្វែងរកការជាប់ឆ្នោតឡើងវិញ ប៉ុន្តែមិនបានប្រកាសជាផ្លូវការនោះឡើយ។ ការលើកឡើងចុងក្រោយរបស់លោកនេះ បានកើតឡើងប្រហែល ១ឆ្នាំមុនការបោះឆ្នោតឆ្នាំ២០២៦។ គេនៅតែមិនទាន់ច្បាស់នោះទេថា អ្នកណានឹងក្លាយជាគូប្រជែងដ៏សំខាន់របស់លោក៕