ឯកឧត្តម លឹម ផាន់ភារៈ អនុរដ្ឋលេខាធិការក្រសួងពាណិជ្ជកម្ម បានអញ្ជើញចូលរួមក្នុងវេទិកានាំចេញអន្តរជាតិ “Made in Russia” នៅ ទីក្រុងមូស្គូ សហព័ន្ធរុស្ស៊ី។

អំឡុងពេលចូលរួមវេទិកា នាថ្ងៃទី២១ ខែតុលា ឆ្នាំ២០២៥ នេះ ឯកឧត្តមអនុរដ្ឋលេខាធិការ បានអញ្ជើញចូលរួមក្នុងកិច្ចពិភាក្សាស្តីពី “វិធានគាំទ្រដោយរដ្ឋាភិបាលឆ្ពោះទៅប្រព័ន្ធអេកូឡូស៊ីសមាហរណកម្ម៖ កាលានុវត្តភាពថ្មីសម្រាប់ពន្លាជាតិរុស្ស៊ីនៅបរទេស ដើម្បីជំរុញការផ្សព្វផ្សាយនិងការលក់នូវផលិតផលរុស្ស៊ី” ដោយផ្តោតសំខាន់លើឱកាសថ្មីៗសម្រាប់ការផ្សព្វផ្សាយផលិតផលឧស្សាហកម្មតាមរយៈការរៀបចំពន្លាជាតិ ការលក់រាយ ការផ្សព្វផ្សាយអំពីម៉ាក “Made in Russia” និងទិសដៅថ្មីក្នុងការផ្សព្វផ្សាយផលិតផលអាហារ ផលិតផលឧស្សាហកម្ម និងសេវាកម្ម។   

ជាមួយគ្នានេះ ឯកឧត្តមអនុរដ្ឋលេខាធិការ ក៏បានទទួលជួបពិភាក្សាការងារជាមួយតំណាងក្រុមហ៊ុន Alpharma ដែលមានបំណងស្វែងរកដៃគូសហការនៅកម្ពុជា ក្នុងផ្នែកឱសថ និងតំណាងក្រុមហ៊ុនTalina Group ដែលមានបំណងស្វែងរកដៃសហការក្នុងផ្នែកអាហារបំប៉នសម្រាប់សត្វចិញ្ចឹម។ ឯកឧត្តម ក៏បានជម្រាបជូនតំណាងក្រុមហ៊ុនទាំងពីរ អំពីកាលានុវត្តភាព និងអត្ថប្រយោជន៍នៃការវិនិយោគនៅកម្ពុជា រួមមានការលើកទឹកចិត្តនិងកិច្ចគាំពារវិនិយោគ ការទទួលបានទីផ្សារនាំចេញទូលំទូលាយជាមួយនឹងការអនុគ្រោះពន្ធគយតាមរយៈកិច្ចព្រមព្រៀងពាណិជ្ជកម្មសេរីដែលកម្ពុជាសម្រចបាន។

គួរបញ្ជាក់ថា វេទិកានេះ ប្រារព្ធ ក្រោមអធិបតីភាព ឯកឧត្តម មីខាអ៊ីល មីស្ស៊ូស្ទីន (Mikhail Mishustin) នាយករដ្ឋមន្រ្តីរុស្ស៊ី ជាមួយវត្តមាននៃមន្រ្តីជាន់ខ្ពស់រដ្ឋាភិបាល ថ្នាក់ដឹកនាំធុរកិច្ច អ្នកជំនាញ ក្រុមហ៊ុននាំចេញរុស្ស៊ី និងបរទេស សរុបប្រមាណ ៥០០០រូប មកពីបណ្តាប្រទេសជាង៨០ ជុំវិញពិភពលោក។ វេទិកាប្រចាំឆ្នាំនេះ បានរៀបចំឡើងក្នុងគោលបំណងលើកកម្ពស់កិច្ចសហប្រតិបត្តិការពាណិជ្ជកម្មនិងសេដ្ឋកិច្ច ជាពិសេសជំរុញការធ្វើពាណិជ្ជកម្មអន្តរជាតិរវាងរុស្ស៊ីនិងបណ្តាប្រទេសដៃគូ៕