កាលពីព្រឹកថ្ងៃទី២២ ខែតុលា ឆ្នាំ២០២៥ លោកជំទាវ តឹក កុស្សនា អគ្គលេខាធិការរងនៃអគ្គលេខាធិការដ្ឋានគណៈកម្មាធិការកែទម្រង់រដ្ឋបាលសាធារណៈ តំណាងអគ្គលេខាធិការដ្ឋានគណៈកម្មាធិការកែទម្រង់រដ្ឋបាលសាធារណៈ បានដឹកនាំប្រតិភូនៃអគ្គលេខាធិការដ្ឋានគណៈកម្មាធិការកែទម្រង់រដ្ឋបាលសាធារណៈ ចូលរួមសិក្ខាសាលាពិគ្រោះយោបល់លើរបាយការណ៍ស្តីពី “ប្រសិទ្ធភាពនៃយន្តការសម្របសម្រួលកិច្ចការកែទម្រង់គន្លឹះនៃរាជរដ្ឋាភិបាល” របស់អ្នកជំនាញការនៃសហភាពអឺរ៉ុប នៅសណ្ឋាគារ (Hyatt Regency Hotel) រាជធានីភ្នំពេញ ក្រោមអធិបតីភាព ឯកឧត្តមបណ្ឌិត ហ៊ែល ចំរើន រដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ និងជាអគ្គលេខាធិការរងនៃអគ្គលេខាធិការដ្ឋានគណៈកម្មាធិការកែទម្រង់ការគ្រប់គ្រងហិរញ្ញវត្ថុសាធារណៈ។

សិក្ខាសាលានេះ រៀបចំឡើងក្នុងគោលបំណង ដើម្បីពិគ្រោះយោបល់ និងប្រមូលធាតុចូលបន្ថែមឱ្យកាន់តែមានភាពគ្រប់ជ្រុងជ្រោយបន្ថែមទៀតពីអគ្គលេខាធិការដ្ឋាន/លេខាធិការដ្ឋានកែទម្រង់ទាំង៥ លើសេចក្តីព្រាងរបាយការណ៍លើកទី១ ស្តីពី «ប្រសិទ្ធភាពនៃយន្តការសម្របសម្រួលកិច្ចការកែទម្រង់គន្លឹះនៃរាជរដ្ឋាភិបាល» ដែលរៀបចំដោយជំនាញការនៃសហភាពអឺរ៉ុប។ សិក្ខាសាលានេះបន្ទាប់ពីបានជួបប្រជុំជាមួយអគ្គលេខាធិការដ្ឋាន/លេខាធិការដ្ឋានកែទម្រង់ទាំង៥ និងអង្គភាពពាក់ព័ន្ធ ក្នុងអំឡុងបេសកកម្មលើកទី១ កាលពីខែមិថុនា ឆ្នាំ២០២៥ កន្លងមកនេះ។

សូមជម្រាបថា សិក្ខាសាលារៀបចំឡើង ដោយអគ្គលេខាធិការដ្ឋានគណៈកម្មាធិការកែទម្រង់ការគ្រប់គ្រងហិរញ្ញវត្ថុសាធារណៈនេះ មានការចូលរួមពីថ្នាក់ដឹកនាំ និងមន្រ្តីជំនាញតំណាងការដ្ឋានកែទម្រង់ទាំង៥ រួមមានអគ្គលេខាធិការដ្ឋាននៃគណ:កម្មាធិការដឹកនាំការគ្រប់គ្រងហិរញ្ញវត្ថុសាធារណៈ, លេខាធិការដ្ឋាននៃគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ, អគ្គលេខាធិការដ្ឋាននៃគណៈកម្មាធិការកែទម្រង់រដ្ឋបាលសាធារណៈ, អគ្គលេខាធិការដ្ឋាននៃគណៈកម្មាធិការដឹកនាំការកែទម្រង់ច្បាប់ និងអគ្គលេខាធិការដ្ឋាននៃគណៈកម្មាធិការដឹកនាំការកែទម្រង់ប្រព័ន្ធយុត្តិធម៌ ព្រមទាំងក្រុមប្រឹក្សានីតិកម្ម និងតំណាងអង្គភាពចំណុះក្រសួងសេដ្ឋកិច្ចនិងហិរញ្ញវត្ថុ និងមន្ត្រីជំនាញពាក់ព័ន្ធ ព្រមទាំងមានការចូលរួមធ្វើបទបង្ហាញពីវាគ្មិន លោក Tibor Draskovics ជំនាញការនៃសហភាពអឺរ៉ុបផងដែរ៕