សេតវិមានបាននិយាយកាលពីថ្ងៃព្រហស្បតិ៍ទី ២៣ តុលាថា ប្រធានាធិបតីអាមេរិកលោក Donald Trump នឹងជួបប្រធានាធិបតីចិន Xi Jinping នៅសប្តាហ៍ក្រោយ ក្នុងប្រទេសកូរ៉េខាងត្បូង ដោយបញ្ជាក់ថា កិច្ចចរចាដែលរំពឹងទុកជាយូរមកហើយនឹងដំណើរការ ទោះបីជាមានភាពតានតឹងពាណិជ្ជកម្មនាពេលថ្មីៗនេះរវាងប្រទេសមានសេដ្ឋកិច្ចធំជាងគេបំផុតទាំងពីរលើពិភពលោកក៏ដោយ។  

អ្នកនាំពាក្យសេតវិមានលោកស្រី Karoline Leavitt បាននិយាយថា លោក Trump នឹងចាកចេញទៅកាន់ប្រទេសម៉ាឡេស៊ីនៅយប់ថ្ងៃសុក្រនេះ បន្ទាប់មកឈប់សំចតនៅប្រទេសជប៉ុន និងកូរ៉េខាងត្បូង។ លោកនឹងជួបលោក Xi នៅថ្ងៃព្រហស្បតិ៍បន្ទាប់ ក្រោយថ្លែងសុន្ទរកថាក្នុងកិច្ចប្រជុំកំពូលនាយកប្រតិបត្តិ(CEO Summit)កិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក(APEC)នៅទីក្រុងBusan។

លោកស្រី Leavitt និយាយថា នៅព្រឹកថ្ងៃព្រហស្បតិ៍៣០តុលា ម៉ោងក្នុងស្រុក លោកប្រធានាធិបតី Trump នឹងចូលរួមក្នុងកិច្ចប្រជុំទ្វេភាគីជាមួយប្រធានាធិបតីចិន Xi Jinping មុនពេលចាកចេញមកកាន់សហរដ្ឋអាមេរិកវិញ។  

កិច្ចប្រជុំនេះកើតឡើងបន្ទាប់ពីមានភាពមិនច្បាស់លាស់ជាច្រើនសប្តាហ៍ជុំវិញថាតើជំនួបនោះនឹងធ្វើឡើងឬអត់។ ជម្លោះពាណិជ្ជកម្មរវាងទីក្រុងវ៉ាស៊ីនតោន និងទីក្រុងប៉េកាំង បានផ្ទុះឡើងនៅដើមខែនេះ បន្ទាប់ពីប្រទេសចិនបានពង្រីកការទប់ស្កាត់ការនាំចេញលើរ៉ែកម្រ ដែលជំរុញឱ្យលោក Trump គំរាមដំឡើងពន្ធថ្មីជាការសងសឹក។

លោកក៏នឹងជួបនាយករដ្ឋមន្ត្រីម៉ាឡេស៊ី លោក Anwar Ibrahim នៅថ្ងៃអាទិត្យ នាយករដ្ឋមន្ត្រីជប៉ុនលោកស្រី Sanae Takaichi នៅទីក្រុងតូក្យូ នៅថ្ងៃអង្គារ និងប្រធានាធិបតីកូរ៉េខាងត្បូងលោក Lee Jae Myung នៅថ្ងៃពុធ ផងដែរ៕