លោកប្រធានាធិបតីរុស្ស៊ី Vladimir Putin បាននិយាយកាលពីថ្ងៃព្រហស្បតិ៍ ២៣ តុលា ថា កិច្ចប្រជុំកំពូល និងទីតាំងជំនួប នៅទីក្រុង ប៊ុយដាប៉េស ប្រទេសហុងគ្រី ត្រូវបានស្នើឡើងដោយប្រធានាធិបតីអាមេរិក Donald Trump។ 

លោក Putin បាននិយាយថា ក្នុងការសន្ទនាតាមទូរស័ព្ទចុងក្រោយរបស់លោកទាំងពីរ ភាគីសហរដ្ឋអាមេរិកបានស្នើទាំងកិច្ចប្រជុំ ទាំងទីតាំងដោយខ្លួនឯង ហើយរូបលោកបានយល់ព្រមចំពោះសំណើនេះ។ទាំងនេះ បានបង្ហាញពីគំនិតរបស់លោកលើបញ្ហានេះ ហើយបាននិយាយថា ពិតណាស់ កិច្ចប្រជុំបែបនេះត្រូវតែរៀបចំឱ្យបានល្អ។  

ប្រធានាធិបតីរុស្ស៊ីរូបនេះ បានបន្ថែមថា ទីក្រុងមូស្គូតែងតែគាំទ្រ និងបន្តគាំទ្រការសន្ទនាជាមួយទីក្រុងវ៉ាស៊ីនតោន។

លោក Putin បានលើកឡើងថា តើលោកអាចនិយាយអ្វីបាន? ការសន្ទនាតែងតែប្រសើរជាងការប្រឈមដាក់គ្នា ជាងជម្លោះប្រភេទខ្លះ ឬសូម្បីតែសង្រ្គាម។

កាលពីថ្ងៃពុធ ២២ តុលា លោក Donald Trump ដែលបានហៅប្រទេសរុស្ស៊ីថាជាខ្លាក្រដាស បាននិយាយថារូបលោកបានលុបចោលកិច្ចប្រជុំកំពូលដែលបានគ្រោងទុកជាមួយលោក Putin។ រតនាគារអាមេរិកបានដាក់ទណ្ឌកម្មលើក្រុមហ៊ុនប្រេងធំៗចំនួនពីររបស់រុស្ស៊ី។

លោក Putin បានចាត់ទុកការដាក់ទណ្ឌកម្មនេះថាជាទង្វើមិនរាក់ទាក់ ដោយនិយាយថាទណ្ឌកម្មទាំងនេះ នឹងមិនប៉ះពាល់ខ្លាំងដល់សេដ្ឋកិច្ចរុស្ស៊ីទេ ហើយបាននិយាយអំពីសារៈសំខាន់របស់រុស្ស៊ីចំពោះទីផ្សារពិភពលោក។ លោកបានព្រមានថា ការធ្លាក់ចុះនៃការផ្គត់ផ្គង់យ៉ាងខ្លាំងនឹងរុញឲ្យតម្លៃប្រេងហក់ឡើងខ្ពស់ និងមិនស្រួលសម្រាប់ប្រទេសនានា ដូចជាសហរដ្ឋអាមេរិកជាដើម៕