បណ្ដាមេដឹកនាំសហភាពអឺរ៉ុប (EU) បានព្រមព្រៀងគ្នាកាលពីថ្ងៃព្រហស្បតិ៍ (២៣ តុលា) ថានឹងបំពេញ "តម្រូវការហិរញ្ញវត្ថុបន្ទាន់" របស់អ៊ុយក្រែន សម្រាប់ពេល ២ឆ្នាំខាងមុខ ប៉ុន្តែមិនបានសម្រេចចិត្តអនុម័តផែនការប្រើប្រាស់ទ្រព្យសម្បត្តិរបស់រុស្ស៊ី ដែលត្រូវបង្កក ដើម្បីផ្តល់មូលនិធិដល់ឥណទានឱ្យទីក្រុងគីវឡើយ ដោយសារក្ដីបារម្ភដែលបានលើកឡើងដោយបែលហ្ស៊ិក។

ជំហររបស់បែលហ្ស៊ិក មានសារៈសំខាន់ណាស់ ដោយសារស្ថាប័នហិរញ្ញវត្ថុរបស់បែលហ្ស៊ិក គឺ Euroclear ជាអ្នកកាន់កាប់ទ្រព្យសម្បត្តិបង្កករបស់រុស្ស៊ី ដែលនឹងត្រូវប្រើដើម្បីផ្តល់កម្ចីឥតការប្រាក់ចំនួន ១៤០ពាន់លានអឺរ៉ូ (១៦៣,២៧ ពាន់លានដុល្លារអាមេរិក) ដើម្បីជួយអ៊ុយក្រែន ក្នុងការតតាំងនឹងប្រតិបត្តិការយោធារុស្ស៊ី។

រដ្ឋាភិបាលប្លុកអឺរ៉ុបជាច្រើនបានសង្ឃឹមថា មេដឹកនាំនៅកិច្ចប្រជុំកំពូលទីក្រុងប្រ៊ុចសែល នឹងផ្តល់ពរជ័យដល់គំនិតនេះ ហើយស្នើឱ្យគណៈកម្មការអឺរ៉ុប ដែលជាស្ថាប័នប្រតិបត្តិរបស់ EU ផ្តល់សំណើផ្លូវច្បាប់ជាផ្លូវការក្នុងសប្តាហ៍ខាងមុខ។ ប្រធានាធិបតីអ៊ុយក្រែន លោក Volodymyr Zelenskiy ដែលជាភ្ញៀវក្នុងកិច្ចប្រជុំកំពូលនោះ ក៏បានជំរុញឱ្យ EU អនុម័តសំណើកម្ចីនេះឱ្យឆាប់បំផុត ដោយនិយាយថា ទីក្រុងគីវនឹងប្រើផ្នែកសំខាន់នៃមូលនិធិនេះដើម្បីទិញអាវុធអឺរ៉ុប។

យ៉ាងណាមិញ នាយករដ្ឋមន្ត្រីបែលហ្ស៊ិក លោក Bart De Wever បានបញ្ចេញសារព្រមានយ៉ាងមុតមាំថា លោកអាចគាំទ្រផែនការប្រើទ្រព្យបង្កកនេះបាន លុះត្រាតែមានការធានាច្បាស់លាស់ថា ជំហាននេះជារឿងស្របច្បាប់ ហើយប្រទេស EU ផ្សេងទៀតនឹងស្ម័គ្រចិត្តចែករំលែកហានិភ័យពាក់ព័ន្ធ។ រុស្ស៊ីហៅគំនិតនេះថាជាការរឹបអូសទ្រព្យសម្បត្តិដោយខុសច្បាប់ ហើយព្រមានពីការសងសឹកយ៉ាងចាស់ដៃ៕