ប្រធានាធិបតីសហរដ្ឋអាមេរិក លោក Donald Trump បាននិយាយកាលពីថ្ងៃព្រហស្បតិ៍ ថា ម្ចាស់ជំនួយឯកជនដែលមានទ្រព្យច្រើន បានផ្តល់ប្រាក់ចំនួន១៣០លានដុល្លារដល់រដ្ឋាភិបាលសហរដ្ឋអាមេរិក ដើម្បីរ៉ាប់រងការខ្វះខាតដែលអាចកើតមានសម្រាប់ប្រាក់ខែយោធាបណ្តាលមកពីការបិទរដ្ឋាភិបាលដែលកំពុងនៅបន្ត។

ថ្លែងនៅក្នុងព្រឹត្តិការណ៍មួយនៅសេតវិមាន លោក Trump បានសរសើរដល់ម្ចាស់ជំនួយអ្នកមានទ្រព្យ ជាអ្នកស្នេហាជាតិ និងជា «មិត្តរបស់ខ្ញុំ» ប៉ុន្តែពុំបានបញ្ចេញឈ្មោះនោះទេ។

លោក Trump បាននិយាយថា «គាត់បានទូរស័ព្ទមកពួកយើងកាលពីថ្ងៃមុន និងបាននិយាយថា «ខ្ញុំសូមរួមចំណែកក្នុងការខ្វះខាតណាមួយដែលអ្នកមាន ដោយសារតែការបិទរដ្ឋាភិបាល ដោយសារតែខ្ញុំស្រឡាញ់យោធា និងស្រឡាញ់ប្រទេស»។ រដ្ឋបាលនេះ ប្រឈមនឹងសម្ពាធកាន់តែខ្លាំងដើម្បីធានាបានថាសមាជិកបម្រើសេវាក្នុងកាតព្វកិច្ចដ៏សកម្ម ទទួលបានប្រាក់បៀវត្សរ៍របស់ពួកគេ ទោះបីជាថវិកាជាប់គាំងក៏ដោយ។ កាលពីពេលមុន លោក Trump បានចុះហត្ថលេខាលើក្រឹត្យ ណែនាំឲ្យមន្ទីរបញ្ចកោណ រៀបចំមូលនិធិស្រាវជ្រាវដែលមិនប្រើ ដើម្បីគ្រប់គ្រងប្រាក់ខែ។

ប្រធានសភាលោក Mike Johnson បានហៅការផ្លាស់ប្តូរការផ្តល់មូលនិធិយោធានេះថាជា ការជួសជុលបណ្តោះអាសន្ន និងបានព្រមានថា កងទ័ពអាចនឹងខកខានប្រាក់ខែរបស់ពួកគេក្នុងពេលឆាប់ៗនេះ ប្រសិនបើសភាមិនអនុម័តដំណោះស្រាយថវិកា។ រដ្ឋាភិបាលសហព័ន្ធរបស់សហរដ្ឋអាមេរិក ត្រូវបានបិទដោយផ្នែក ចាប់តាំងពីថ្ងៃទី១ ខែតុលា ខណៈសមាជិកសភានៅក្នុងសភានៅតែជាប់គាំងលើថវិកាថ្មី ដោយមានជម្លោះជុំវិញការឧបត្ថម្ភធនផ្នែកថែទាំសុខភាពជាចំណុចកណ្តាលនៃភាពជាប់គាំងនេះ។