នាយករដ្ឋមន្ត្រីម៉ាឡេស៊ី លោក Anwar Ibrahim កាលពីថ្ងៃព្រហស្បតិ៍ (២៣ តុលា) បានបញ្ជាក់ថា វត្តមានរបស់ថ្នាក់ដឹកនាំអន្តរជាតិជាច្រើនរូប រួមមាននាយករដ្ឋមន្ត្រីចិន Li Qiang និងមេដឹកនាំផ្សេងទៀត ព្រមទាំងតំណាងមកពីអាមេរិក ជប៉ុន អឺរ៉ុប មជ្ឈិមបូព៌ា រុស្ស៊ី អាមេរិកឡាទីន អូស្ត្រាលី នូវែលសេឡង់ និងអាហ្វ្រិកខាងត្បូង នឹងទៅចូលរួមកិច្ចប្រជុំកំពូលលើកទី៤៧ នៃសមាគមប្រជាជាតិអាស៊ីអាគ្នេយ៍ (អាស៊ាន) ចាប់ពីចុងសប្ដាហ៍នេះ។

កិច្ចប្រជុំកំពូលអាស៊ាន ចាប់ផ្តើមនៅថ្ងៃអាទិត្យ ទី២៦ ខែតុលា និងបន្តរហូតដល់ថ្ងៃទី២៨ ខែតុលា នៅទីក្រុងកូឡាឡាំពួរ ជាទីដែលលោកប្រធានាធិបតីអាមេរិក Donald Trump ត្រូវបានគេរំពឹងថា នឹងធ្វើជាសាក្សីដោយផ្ទាល់នៃពិធីចុះហត្ថលេខាលើកិច្ចព្រមព្រៀងសន្តិភាពរវាងកម្ពុជា និងថៃ នេះបើយោងតាមទីភ្នាក់ងារសារព័ត៌មានរដ្ឋ Bernama។

ធនាគារពិភពលោក ប្រធានមូលនិធិរូបិយវត្ថុអន្តរជាតិ (IMF) និងអ្នកតំណាងមកពីអង្គការពិភពលោកផ្សេងទៀត ក៏ត្រូវរំពឹងថានឹងទៅចូលរួមជំនួបកំពូលនេះផងដែរ។ យ៉ាងណាមិញ ប្រធានាធិបតីរុស្ស៊ី លោក Vladimir Putin និងប្រមុខរបបសឹកមីយ៉ាន់ម៉ា លោក Min Aung Hlaing នឹងរំលងព្រឹត្តិការណ៍នេះ។ ចំណែកលោកនាយករដ្ឋមន្រ្តីឥណ្ឌា Narendra Modi នឹងចូលរួមតាមបណ្ដាញអនឡាញ។

ប្លុកនៃប្រជាជាតិអាស៊ីអាគ្នេយ៍ទាំង១០នេះ -- ក្រៅពីកិច្ចប្រជុំផ្ទៃក្នុងរបស់ខ្លួន -- ក៏នឹងមានរៀបចំកិច្ចប្រជុំកំពូលកម្រិតប្លុក ជាមួយមេដឹកនាំនៃដៃគូសន្ទនាសំខាន់ៗ រួមមានអាមេរិក ចិន និងជប៉ុន។ អំឡុងព្រឹត្តិការណ៍នៅទីក្រុងកូឡាឡាំពួរនោះ ប្រទេសទីម័រឡេស្តេ ឬទីម័រខាងកើត គ្រោងនឹងចូលរួមជាមួយប្លុកនេះ ក្នុងនាមជាសមាជិកទី១១៕