ប្រធានាធិបតីអាមេរិក លោក Donald Trump កាលពីថ្ងៃព្រហស្បតិ៍ (២៣ តុលា) បានប្រកាសបញ្ចប់កិច្ចចរចាពាណិជ្ជកម្មទាំងអស់ជាមួយកាណាដា បន្ទាប់ពីអ្វីដែលលោកហៅថា "ការផ្សាយពាណិជ្ជកម្មបោកប្រាស់ក្លែងបន្លំ" ដែលនៅក្នុងនោះ បានបង្ហាញឱ្យឃើញលោកអតីតប្រធានាធិបតី Ronald Reagan និយាយអវិជ្ជមានពីពន្ធគយ។

លោក Trump បានសរសេរបង្ហោះលើបណ្ដាញសង្គម Truth Social ថា "ផ្អែកលើអាកប្បកិរិយាដ៏អាក្រក់របស់ពួកគេ ការចរចាពាណិជ្ជកម្មទាំងអស់ជាមួយកាណាដា ត្រូវបានបញ្ចប់"។

ប្រមុខខេត្ត Ontario របស់កាណាដា លោក Doug Ford បាននិយាយនៅដើមសប្តាហ៍នេះថា ការផ្សាយពាណិជ្ជកម្មទាក់ទងនឹងការផ្ញើសារប្រឆាំងពន្ធ បានទាក់ទាញចំណាប់អារម្មណ៍លោក Trump ហើយ។ គួរបញ្ជាក់ថា វីដេអូឃ្លីបផ្សាយពាណិជ្ជកម្មនោះ បានបង្ហាញឱ្យឃើញលោក Reagan ដែលជាសមាជិកបក្សសាធារណរដ្ឋរបស់អាមេរិក បានថ្លែងរិះគន់ការដំឡើងពន្ធលើទំនិញបរទេស ដោយនិយាយថា ពន្ធបណ្តាលឱ្យបាត់បង់ការងារ និងមានសង្គ្រាមពាណិជ្ជកម្ម។

ការប្រកាសបញ្ចប់កិច្ចពិភាក្សានេះ កើតឡើងបន្ទាប់ពីលោក Trump បានដាក់ពន្ធលើដែកថែប អាលុយមីញ៉ូម និងរថយន្តរបស់កាណាដា កាលពីដើមឆ្នាំនេះ ហើយភាគីទាំងពីរកំពុងពិភាក្សាគ្នាអស់ជាច្រើនសប្តាហ៍មកហើយលើកិច្ចព្រមព្រៀងមួយ។ នាយករដ្ឋមន្ត្រីកាណាដា លោក Mark Carney បាននិយាយកាលថ្ងៃព្រហស្បតិ៍ថា កាណាដានឹងមិនអនុញ្ញាតឱ្យអាមេរិក ចូលទៅទីផ្សាររបស់ខ្លួនដោយអយុត្តិធម៌ឡើយ ប្រសិនបើការពិភាក្សាកិច្ចព្រមព្រៀងពាណិជ្ជកម្មផ្សេងៗជាមួយទីក្រុងវ៉ាស៊ីនតោន បរាជ័យ៕