ប្រទេសឥណ្ឌាបានសាកល្បងប្រើសារធាតុបង្កើតពពកលើរដ្ឋធានី ដែលគ្របដណ្ដប់ដោយផ្សែងអ័ព្ទជាលើកដំបូង ដោយបាញ់សារធាតុគីមីចេញពីយន្តហោះ ដើម្បីជំរុញឲ្យមានទឹកភ្លៀង និងលាងសម្អាតភាគល្អិតដ៏គ្រោះថ្នាក់នៅក្នុងខ្យល់។

ការបង្កើតពពក គឺជាការអនុវត្តនៃការប្រើប្រាស់យន្តហោះដើម្បីបាញ់អំបិល ឬសារធាតុគីមីផ្សេងទៀតចូលទៅក្នុងពពក ដើម្បីបង្កើតឲ្យមានភ្លៀង។

ក្រុមអាជ្ញាធរទីក្រុង New Delhi ដែលធ្វើការជាមួយវិទ្យាស្ថានបច្ចេកវិទ្យាឥណ្ឌា Kanpur របស់រដ្ឋាភិបាល បានបើកដំណើរការសាកល្បងកាលពីរសៀលថ្ងៃព្រហស្បតិ៍ ២៣ តុលា ដោយប្រើយន្តហោះធុនស្រាល Cessna លើតំបន់ Burari ភាគខាងជើងនៃរដ្ឋធានីនេះ។

លោក Manjinder Singh Sirsa មន្ត្រីជាន់ខ្ពស់ឥណ្ឌា បាននិយាយនៅក្នុងសេចក្តីថ្លែងការណ៍មួយកាលពីល្ងាចថ្ងៃព្រហស្បតិ៍ថា ការហោះហើរសាកល្បងមួយត្រូវបានធ្វើឡើងរួចរាល់ហើយ ក្នុងការងារសាកល្បងបង្កើតពពក។

មន្ត្រីជាន់ខ្ពស់មួយរូបទៀតរបស់ក្រុង Delhi បាននិយាយថា ប្រសិនបើលក្ខខណ្ឌនៅតែអំណោយផល រដ្ឋធានីនេះ នឹងជួបប្រទះភ្លៀងសិប្បនិម្មិតលើកដំបូងនៅថ្ងៃទី ២៩ ខែតុលាខាងមុខ។

New Delhi និងតំបន់ទីប្រជុំជនដ៏ធំទូលាយដែលមានប្រជាជន ៣០លាននាក់ត្រូវបានជាប់ចំណាត់ថ្នាក់ជាទៀងទាត់ក្នុងចំណោមរដ្ឋធានីដែលមានការបំពុលខ្លាំងបំផុតរបស់ពិភពលោក ជាមួយនឹងផ្សែងអ័ព្ទយ៉ាងធ្ងន់ធ្ងរគ្របដណ្តប់លើផ្ទៃមេឃរាល់រដូវរងា៕