ទីភ្នាក់ងារអង្គការសហប្រជាជាតិចំនួនបួន បាននិយាយកាលពីថ្ងៃព្រហស្បតិ៍ថា ប្រទេសស៊ូដង់កំពុងប្រឈមភាពអាសន្នធ្ងន់ធ្ងរបំផុតមួយរបស់ពិភពលោក ដែលមានមនុស្សជាង ៣០ លាននាក់ត្រូវការជំនួយមនុស្សធម៌ រួមទាំងជនភៀសខ្លួនក្នុងប្រទេសជាង៩,៦លាននាក់ និងកុមារជិត១៥ លាននាក់។

ក្នុងសេចក្តីប្រកាសព័ត៌មានរួម អង្គការទេសន្តរប្រវេសន៍អន្តរជាតិ (IOM) ទីភ្នាក់ងារជនភៀសខ្លួនអង្គការសហប្រជាជាតិ (UNHCR) មូលនិធិកុមាររបស់អង្គការសហប្រជាជាតិ និងកម្មវិធីស្បៀងអាហារពិភពលោក បានអំពាវនាវឱ្យអន្តរជាតិយកចិត្តទុកដាក់ជាបន្ទាន់ចំពោះវិបត្តិក្នុងប្រទេសស៊ូដង់។  

ការចេញផ្សាយនេះបាននិយាយថា ជាង ៩០០ ថ្ងៃនៃការប្រយុទ្ធគ្នាយ៉ាងខ្លាំងក្លា ការរំលោភសិទ្ធិមនុស្សយ៉ាងទូលំទូលាយ គ្រោះទុរ្ភិក្ស និងការដួលរលំនៃសេវាកម្មទ្រទ្រង់ជីវិត បានរុញច្រានមនុស្សរាប់លាននាក់ទៅកាន់មាត់ជ្រោះនៃការរស់រានមានជីវិត ជាពិសេសស្ត្រី និងកុមារ។

របាយការណ៍បាននិយាយថាក្នុងអំឡុងពេលដំណើរទស្សនកិច្ចទៅកាន់ប្រទេសស៊ូដង់នាពេលថ្មីៗនេះ ក្រុមមេដឹកនាំជាន់ខ្ពស់មកពីទីភ្នាក់ងារទាំងបួនរបស់អង្គការសហប្រជាជាតិបានមើលឃើញពីផលប៉ះពាល់ដ៏ធ្ងន់ធ្ងរនៃវិបត្តិនេះ នៅទូទាំងប្រទេស រួមទាំងនៅ តំបន់ Darfur រដ្ឋធានី Khartoum និងតំបន់ដែលរងផលប៉ះពាល់ដោយជម្លោះផ្សេងទៀត។

យោងតាមសេចក្ដីប្រកាសខាងលើពេលនេះជម្លោះបានឈានចូលដល់ឆ្នាំទី៣ហើយ ។ជម្លោះនៅស៊ូដង់បានបំផ្លិចបំផ្លាញសេវាសំខាន់ៗដូចជា ការថែទាំងសុខភាព និងវិស័យអប់រំជាដើម។គ្រោះទុរ្ភិក្ស ត្រូវបានបញ្ជាក់ថាបានប៉ះពាល់ក្នុងតំបន់ជាច្រើនក្នុងប្រទេសនេះកាលពីឆ្នាំមុន ហើយស្ថានភាពអត់ឃ្លាននៅតែធ្ងន់ធ្ងរដោយកុមារស្ថិតក្នុងចំណោមមនុស្សរងគ្រោះខ្លាំងជាងគេបំផុត ហើយអត្រាខ្វះអាហារូបត្ថម្ភកំពុងកើនឡើង៕