ក្នុងកិច្ចប្រជុំកំពូលទីក្រុងឡុងដ្រ៍ នៅថ្ងៃសុក្រ (២៤ តុលា) នេះ លោកនាយករដ្ឋមន្ត្រីចក្រភពអង់គ្លេស Keir Starmer គ្រោងនឹងជំរុញសម្ព័ន្ធមិត្តឱ្យផ្ដល់មីស៊ីលរយៈចម្ងាយឆ្ងាយកាន់តែច្រើនបន្ថែមទៀតទៅអ៊ុយក្រែន ដើម្បីវាយប្រហារគោលដៅរុស្ស៊ី នេះបើតាមសេចក្ដីរាយការណ៍របស់សារព័ត៌មាន BBC។

លោក Starmer នឹងធ្វើជាម្ចាស់ផ្ទះទទួលប្រធានាធិបតីអ៊ុយក្រែន Volodymyr Zelenskyy រួមជាមួយក្រុមថ្នាក់ដឹកនាំដែលហៅថា "សម្ព័ន្ធនៃឆន្ទៈ" រួមមានសម្ព័ន្ធមិត្តអ៊ុយក្រែនជាង ២០រូប ដែលបានយល់ព្រមផ្តល់ការធានាសន្តិសុខឱ្យទីក្រុងគីវ នៅពេលណាដែលមានបទឈប់បាញ់មួយ។

លោក Zelenskyy បានទទូចសុំអស់ជាច្រើនសប្តាហ៍មកហើយសម្រាប់អាវុធរយៈចម្ងាយឆ្ងាយបន្ថែមពីលោកខាងលិច ក្នុងសកម្មភាពមួយដែលរុស្ស៊ីព្រមានថានឹងបង្កើនជម្លោះ។ មីស៊ីលរយៈចម្ងាយឆ្ងាយបានក្លាយជាតម្រូវការដ៏សំខាន់របស់លោក Zelenskyy ក្នុងការចរចាជាមួយសម្ព័ន្ធមិត្ត។

លោក Zelenskyy ទៅដល់អង់គ្លេស ក្រោយជ័យជម្នះការទូតចំនួនពីរក្នុងសប្តាហ៍នេះ៖ ទីមួយគឺការសម្រេចចិត្តរបស់លោកប្រធានាធិបតីអាមេរិក Donald Trump ចុងក្រោយដាក់ទណ្ឌកម្មបន្ថែមទៀតលើរុស្ស៊ី ហើយទីពីរគឺប្លុកអឺរ៉ុបយល់ព្រមបំពេញគម្លាតថវិកាអ៊ុយក្រែន។ BBC សង្កត់ធ្ងន់ថា លោក Starmer សង្ឃឹមថានឹងរក្សាសន្ទុះនេះ ដោយការបង្កើនសម្ពាធលើក្រុងមូស្គូដើម្បីចរចាបញ្ចប់សង្គ្រាម៕